Proclama di Carnevale: 18^ edizione delle Cicuzze di Camillo Ferrara.Pubblicazione integrale

Piazza dei Giudici - Cultura ed Eventi

camillo ferraraVi proponiamo la 18esima edizione delle Cicuzze di Camillo Ferrara, quest'anno intitolate "Proclama di Carnevale". Fino ad oggi sono state interpretate, partendo dalla prima edizione del 2000, da artisti del calibro di Leopoldo Mastellone, Giacomo Rizzo, Antonio Allocca, Gianni Simioli, Oscar di Maio, Marina Cioppa. Quando non sono stati gli artisti, invece, è l'Autore stesso che le ha recitate nella sede della Cooperativa Culturale Capuanova. L'appuntamento di ieri sera ha ottenuto un successo strepitoso, considerando l'apprezzamento del pubblico. Le Cicuzze di Camillo Ferrara sono versi in dialetto napoletano che esprimono una satira carnascialesca, "salata e pepata", che prende spunto dalla Città, dai Cittadini e dagli Amministratori, con spirito critico e costruttivo e senza alcuna cattiveria. Sono proprio le condizioni della Città ad ispiranre l'Autore, ovvero, secondo la tradizione, un adirato Re Carnevale declama, fuori dai denti, tutte la ingiustizie che la classe governante fa al popolo. Nel caso dell'Amministrazione Centore è la lentezza nel prendere provvedimenti che fa saltare il tappo dalla bottiglia e pronunciare al Re il suo discorso. L'intento è quello di pungolare gli amministratori di turno ad operare con maggior efficacia, determinazione e trasparenza per il bene della Città, che, secondo l'Autore, è quasi morta o forse è già morta. Camillo Ferrara ama follemente la sua Capua e la considera una città bella, anzi bellissima, ma parecchio sfortunata e, a Suo dire, con un popolo un po' strafottente.

 

 

Proclama di Carnevale

 

Primma ‘e sentì ‘sti Cicuzze salate e pepate
sentit’’a mme, facitavella na rattata,
facite funziona’ cuorne e frachette
pp’ esurcizza’ chist’anno ca porta ‘o 17. !
Non e’ vvero ma ci credo, recitava De Filippo,
ma si Capua nun ce crere e ppo’ vva’ dint’’o ‘nchippo
commo ffarra’ a suppurta’ ‘e cauce e ‘e botavraccie
ca le darra’ ‘stu destino niro ca ll’avutat’’a faccia ?
Cca’ gia’ Ddio ‘o ssape e ‘a maronn’’o vvere
commo stammo cumbinate, ‘a capa ‘o pere.!
Cca’ pp’’a crise,‘o dissesto e ‘e cantamesse
ce mantenimmo, gia’, allerta pe’ scummessa.!
Allora, scungiurammo disgrazie e malatie
a ‘sta Citta’ malata ‘e strufuttenza e pucundria,
augurammole, cu ’o core, ‘na nova e bbona sciorta
commo ll’augurammo a ‘st’Amm.ne ca nascette quase morta .!
Chi dice ca fuje pe’ ccolpa ‘e nu parto pilutato,
cchi dice ca fuje pe’ tenta’ nn’aborto prucurato
e cchi dice ca fuje p’’a cazzimma ‘e nu sciacqualattuca
ca facette parturì a’ ll’urne na maggiuranza tartaruca.
Pero’ pe’ sta semmana scurdateve ‘o ppresente
magnate , bevite e campate alleramente,
facite comm’’e signure ‘e sta Casa Cumunale
addo’ ‘ncapo e ppiere a ll’anno e’ ssempe carnevale.!
Cca’ se magna , se veve e se vene ‘a ‘ntrallazza’,
ato che carnevale sse fa’ cca’ ‘ncoppo cca’,
cca’se va’ a caccia pur’’e scorz’’e lupine
e sse fa’ a vviso scupierto senza ‘o mascarino.
Io ca ‘a cientetrentun’anne vengo ‘nt’’a ‘sta Citta’
me sso’ subbeto accorto ca staie cchiu’ alla’ che acca’,
guardannete, maravigliato’,mme so’ ditto ‘nsurdina :
Capua ss’e’ stutata comm’a nu lumino.!
Dice bbuono ! ‘Ncopp’’o ccuotto ll’acqua vullente .!?
Percio’ mme ss’e’ squartat’’o core vedennete murente
e agg’’a jastemmato a cchi tt’ha scuncuassata
e a tte ca te ne lavast’’e mmane, pegg’’e Ponzio Pilato .
Nun credevo all’uocchie miei e me dicevo stralunato :
Ma…chesta e’ Capua ? Ma addo’ mm’hanno purtato !?
Ma tu vuo’ vere’ cc’avimmo sbagliat’’a strata ?
Pero’ me pareva e’ sta’ a ‘nt’’o viale ‘e via Cappuccini
pecche’ sentevo puzza ‘e morte e de cera ‘e lumine.!
Ma tu vire ‘a Maronna ! Mm’ hanno purtat’’o cimitero.!
Aggi’’a penzato: e cche mm’hanno purtat’’a ffa’, ‘o terrasantiere ?
Po’ agg’’a visto Porta Napule ,’e Ffussate, ’Annunziata
e agg’’a capito ca Capua e’… mmorta e ‘nfracedata.!
E ttu saie chi e’ stato ca ll’ha redotta a cchistu stato !
Certamente Capua mia nun se fosse maie suicidata !
Chesta e’ stata n’eutanasia premeditata e pilutata
da na morra ‘e persunagge abbaccate e chiacchiriate.
‘O dicev’ì ca fosse fatto chesta fine trista
e che mureva ‘ncruciata comm’a Giesu’ Cristo,
ss’hanno magnata e ss’hannu vippeto chesta bbella Citta’
e mmo’ manco ‘o Pataterno ‘a po’ venì a salva’.!
Pure ‘o Carnevale cch’era ll’urgoglio ‘e ‘sta Citta’
ll’hann ‘acciso a bbotta ‘e ‘nfinferenfì e nfinferenfa’,
e’ stato distrutto a chilli ca, pe’ se ngrassa’ ‘o mazzo,
‘o vulettero, ppe’ fforza, ffa’ addeventa’ na festa ‘e piazza.
E ssapite pecche’ succere sulo cca’ ?
Pecche’ nun ce sta’ cchiu’ ammore p’’a Citta’!
E’ inutile ca vulimmo dicere e vulimmo fa’
pecche’ ce sapimmo sulo fa’ ‘o mmale ‘e scredeta’.
E ppe’ sta ragione, chillobbello Carnevale pupulare,
dint’’a ppoche anne fuie menat’’a mmare
e fuie cancellata, accussì, na seculare tradezione
cch’era annummenata pure for’’a Regione.
Pe’ cchesto e ato Capua ten’‘a capa acalata,
pecche’ sta’ feruta e sta’ priuccupata,
e’ stanca, delusa, schifata e amariggiata
‘a quanno ll’hanno sudumizzata e abbannunata .
E io ‘o saccio pecche’ Capua sta’ ‘ncazzata,
pecche’ h’avuto suppurta’ ‘n’ata trumbata,
sperava ‘e se scurda’ ‘ntrallazze e arruocchie
ma e’ gghiuta pe’ se ffa’a croce e ss’e’ cecato ll’uocchie.!
Ma pure ca tene tutt’’e mutive pp’esse amariggiata
nunn’ hadda maie dicere ca ss’e’ rassignata
pecche’ si se rassegna ha fernuto ‘e campa’
e nun po’ dda’ stu sfizio a cchi cungiura quatto chilometre a’ cca’!
Adda’ tene’ ‘nt’’o core, sempe e viva ‘a speranza
e sse repiglia’’a curona e ll’antica ‘mpurtanza,
cc’adda’ crere e adda’ lutta’ fin’’a morte
si pe’ figlie suoie nun vvo’ ‘na malasciorta.
Mmo’ se spieca pecche’ so’ deserte ‘sti vie
e nun ce sta’cchiu’ vita e nun ce sta’ alleria,
pure ‘o cummercio ca le deva ‘o sustegno
mmo’ ll’aiuto ‘o vo’ isso, ma do Monte de Pegne.!
Pure st’anno, commo e’ tradizione cunsulidata,
ce ss’e’ accorto do carnevale all’urteme jurnate,
e ss’e’ cchiammato p’’o salva’, da na sicura morte,
chillo Raffaele Modugno ca nu ssona ‘o pianuforte.!
E ‘o duttore Modugno, ca me pare ‘o 118,
quanno ‘o succorre, lleva ’a miezo ‘a ricotta
e cu na cura ‘e capuanita’, semprice e naturale
vene a’ dda’ nova vita a cchistu Carnevale.
Allora onore e grazie a stu capuano - imprenditore
ca tene, a’ quann’e’ nnato, Capua dint’’o core,
se sente ca nt’’e vvene le scorre ‘a “capuanita”
sino’ chi cc’’o mettesse a se venì a ‘nguaia’ !
Ben vengano, tutte quante, ‘e private imprenditore
a pposto de pulitice ca songo ‘e ogne culore,
pecche’ ‘sta Citta’ e’ ll’esempio e testimone
ca ll’impresa pubblica e’ ssulo nu bidone.!
Quanta meraviglie nnostre stann’abbandunate
e aspettano, da doppo ‘a guerra,‘e essere accunciate,
mmece stanno lla’, chien’’e zoccole e ‘nfracedate,
aspettanno ‘a carita’ da na pulitica malata.
Percio’ Capua e’ fernuta, nu respira e nun suspira
‘e na Citta’ ca vere nu dimane ca e’ sempe cchiu’ niro,
‘a quanno ll’ha levato ‘a prusperita’ e ‘a speranza
na pulitica ‘e niente fatta sulo ‘e magnanza. !
Pe’ cchesto e’ ssanto e gghiusto ca vaco dint’’a chiazza
pe’ gghìi a prucessa’ a cchesta malarazza,
e a tutte ‘e ‘mbunitore e a cchilli cantastorie
ca, senza pieta’, ll’hanno mannata ‘o priatorio.!
Io so’ cientetrentun’anne ca so’ sempe puntuale,
e ttrovo che sta’ Citta’ e’ ssempe tale e quale
pe’ ccolpa ‘e chilli cuniglie ca ss’abbottan’‘e pastenache
e ca nun so’state maie bbuone, manco a ’nfila’ ll’ago.!
Chesta Capua ‘e ogge e’ comm’a ranceco ‘e mare,
ca va’ areto areto commo a nu funaro,
era ‘e sango riale e ppo’ pp’’e carriagge
e’ addeventata pecora pe’ ffa’ sul’’o furmaggio.
So’ anne e anne ca ha perzo tutt’’a putenza
‘a gloria, ll’urgoglio, ‘o rispetto e ‘a reverenza
e tutto ‘stu mmale pruvene da cca’ ‘ncoppo
addo’ ce sta’ ll’’evera pe’ pecure zoppe.!
Ma mo’ e’ tiempo populo mio,
‘e recita’ stu pruclama ca te darra’ addecrio,
scritto pe’ pungulia’ e cundanna’ chi senza parola
te fa’ vere’, ogni cinq’anne ‘a luna ‘nt’’a bagnarola.
Nt’’a cchella bagnarola addo’ hann’ anniate
‘e suonne e ‘e speranze ‘e ‘sta Citta’ marturiata ,
chilli che ‘a zella a zella ll’hanno fatt’’o caruso,
specie chillo ca fuie ‘o cchiu’ grande ‘nguacchiuso.!
Allora io so’ pronto pe’ declama’ chesti Cicuzze
contro a cchesta nuvella sporta ‘e mmarruzze
comm’e’ tradezione ‘e chesta nobbele Citta’
ca cocche bbuono strunzo tene ‘ncapo ‘e assuggetta’.!
Po’ pe’ ll’ambizione ‘e na maneca ‘e bandite
Capua e’ addeventata nu fiore appassito
commo tutt’’e ccose bbelle ‘e chesta Capua nostra
ca, pe’ magnafranche, se vann’’o paternostro.
Comm’’e ddoie fiere ‘e S.Stefano e Santu Lazzaro
ca pe’ mmano ‘e facenniere e a ll’accordamessere
addeventaieno ddoie bbelle vacche a mognere
addo’ zucaieno fino ‘a fine, senza tene’ vrigogna.
Ma ‘e chesto po’ parlammo , mmo’ fatt’abbraccia’
strigneme forte forte e nun te preoccupa’
ca vene chillo juorno ca chiurarraie nt’’a surecera
‘e surece e ‘e zoccole ca stanno ‘nt’’a zuccarera.
Allora eccomi qua sso’ pronto a pruclama’ :
Salute e male truvato, oi populo sfurtunato.!
Staie meglio, staie peggio o staie abbermecato
ancora ‘e zucasanghe, parassite, scellerate
zecche, sanguette,pimmece e zoccole allentate ?
Ah ! Capua, Capua, citta’ mia bbella e amata !
E commo tt’aggi’’a truvata arruinata !
E cche bbrutto destino ca teniv’astipato !
E, ppe’ gghionta ‘e ruotolo, e’ schiarata ‘n’ata jurnata
ca nun te farra’ durmì pe’ n’ate 1540 nuttate.!
‘O bbello e’ cca cchiu’ vaie annante e cchiu’ ppiglie siggiate,
me pare ca ‘o Pataterno, ‘e te, se nn’e’,proprio scurdato.!
Mmo’ o e’ pecche’ sì addeventata pecora ‘e stalla
o e’ pecche’, sient’a mme, nun tiene cchiu’ ’e ppalle !
‘A colpa, tt’’o dich’ io, e’ de sta cazza ‘e apatia
ca te porta ‘a strafuttenza e cchesta pucundria,
ca non te fa’ move, nun te fa’ sfriccechia’
e te fa’ guarda’, tomo tomo, commo more ‘a Citta’.
‘O ‘5 ‘e giugno ‘e ll’anno ca se nn’e’ gghiuto
castigaste cu ‘e vote, n’amministrazione falluta
p’’a sola colpa ‘e chilli cazze ‘e palette
ca tt’avevano fatto ietta’ iastemme e saette.
Chell’Amministrazione ca nu teneva cchiu’ asciuta
e ca perdette ll’elezione, commo sì ll’ avesse vuluto,
ma tu, pe’ te leva’ a cuollo canneruttizia e ‘ngurdizia
iste pe’ ggrazia e truvast’’a giustizia.!
E io , stasera, sto’ cca’, proprio, pe’ tt’allevia’
‘sta nova ferita ca te sta’ ’a turmenta’
e pe’ te fa’ allicurda’ ca pe’ te fida’ de mezacanne
ssì gghiut’a sciummo cu tutt’’e panne.!
Pero’ pe’ tte ce penz’i’, nun te priuccupa’,
comm’allaggio ’a chiave ‘e chesta Citta’
‘o facc’ ì’ nu colpo ‘e Stato, sturiato e sistemato
e ne mann’’a ffa’ ‘culo a ‘sta banda ‘e sciaurate.
Ma ‘o Carnevale ‘e Capua nunn’e’ Carnevale
si nu satirizzammo, primma, ‘o Generale
cc’amministra’ a’ nove mise ‘sta Citta’
e sta’ ancora cu ‘e ccarte mmano a sturia’.!?
Mannaggia ‘a pressa, dicette ‘a marruzza
ma si c’’o dice a Centore, te guarda e abbuzza
e risponne : chi ha tradut’ ‘o populo, ‘o giuro ‘ncopp’a ll’unore
ca quanno jamm’ a frive sentarra’ ’addore.!
Ma, Genera’, vulite frivere cu ll’uoglio ‘e currivo,
cchello ca cca’ ncoppo ss’ausa pe’ palliativo
o vulite mette dint’’o funno da tiella
ll’uoglio ca ss’ausa pe’ fa’ asci’ fora ‘e tarantelle.?
‘A tradezione ’e Capua, vvo’ che a Carnevale,
‘o populo addeventa’ nu giudece ‘e tribunale
c’’a ‘a licenza ‘e prucessa’, pe’ ‘na semmana,
a cchi ha miso ‘e mmane int’’a tiana.!
Pircio’ mmo’ Generale o nun Generale
me pare justo e pure naturale
ca, primm’ isso, pe’ respetta’ ‘a tradezione
adda’ esse satirizzato, senza discussione.!
Cca’ se dice ca ‘o Sinneco, sturea nott’’e juorno
e che nun se fida manco ‘e chi tene attuorno,
e se ce chiede udienza pe’ ce ìi a ce parla’
te dice ca tt’he’ ffa’ primma ‘o ssiero da verita’.!
Ma mentr’isso sturea Capua nostra more
e tu nunn’ haje besogno de ccur’’e nu duttore,
pe’ tte ce vo’ sulo ‘nn’a sana amministrazione
ca fatica c’’o core, senza ‘o tozzabancone.!
Chesto, forze, teneva ‘ncap’’o Generale
quanno levaie da tavula ‘o mmesale,
‘e ffurchette, ‘e cucchiare e ‘e curtielle
servute a cchi pruvucaie chistu maciello.?
Ma ‘a bbona intenzione more appena nata,
quanno e’ malevista e quann’e’ ustaculata,
e cchello ca mo’ ha capito bbuono, ‘o Generale,
e’ ca tutto ava leva’ a fora che ’o mmesale.!
E mentre sturea e penza e tu ne vuo’ ragione,
isso ss’adda quartia’ pe’ mantene’ ’a pultrona,
pecche’, a ll’elezione comm’e nostra tradezione,
pure stavota nn’e’ asciuto niente ‘e bbuono.!
Quanno ‘a notte ll’urna parturette ‘o risultato
se verette ca poco e niente era cagnato,
pecche’ era nata na maggiuranza malassurtata
rispetto a cchella cch’era stata secutata.
Se dice ca chello ca nun vo’ ll’uorto chello te nasce
percio’ mmo’ staie acchiappato a’ cchesta frasca
ca nu cresce, nu fiurisce e nun dda’ frutte
pe’ ccolpa de gelusie, de descordie e de cumbutte.
Me pare ‘a bbanda ‘e poco me ne fotte,
ce sta’ chi sta’ riuno e cchi ss’abbotta
ce sta’ chi fatica pe’ ffarla cammena’
e cchi lle chiave cauce cu ‘o scopo dd’ azzuppa’.
E cchisto nn’e’ bbuono e chill’ato nemmeno
e tu commo cazzo vuo’ fa’ pp’‘ascì a int’e ppene.?
Scarta fruscio e ppiglia primmera,
cca’ si nun smuove ‘o culo faie pegge d’aiere.!
A primmo acchitto, doppo a’ gioia e ‘o ‘ndusiasmo
ascette fora ‘o primmo cataplasmo,
comm’ ‘o Sinneco annummenaie tre assessore
fernette ‘a pace, ll’endusiasmo e ll’ammore.
E quanno nun ce sta’ ‘a pace e ‘a cuncordia
vvo’ dicere ca ce sta’ odio e descordia,
significa ca ce manc’’o mmeglio : l’unita’
pp’ammenestra’ cu trasparenza ‘sta Citta’.
E allora tu populo, si turnato dint’’o scuordo
pecche’ ‘a vittema sì tu ‘e ‘sti discordie
e de tutt’’e prumesse ca nun so’ state maie mantenute
a’ na pulitica ca ‘e te, nun se ne mmaje futtuto.!
Pecche’ tutt’’e prumesse ca se fann’ all’elezione,
vanno, comm’a ssempe, ‘a gloria ‘e cardone,
e mentre cochheduno sse va’ ‘a se iencher’‘o panaro
tu tt’agliutte na collera ca ‘e sempe cchiu’ amara .
Percio’ pure stavota, sient’a mme, nun cagna niente,
passarraie ‘n’ati cinq’anne ‘e guaie e patemiente,
e accussì sarra’ pecche’, pp’ave’ juvamiento
pigliaste ‘a sputazza p’’a lira ‘argiento .!
Ma chesto era previsto cc’ava pute’ succere,
e ccche ttu aviv’ ave’ chist’ato despiacere,
pecche’ quanno scigliettero ‘e candidate ‘e parte
ce stette coccheduno ca te iette ‘ncul’’a arte.
Pecche’ ? Tu ‘o vvuo’ sape’ pecche’?
Pecche’ doppo ‘a vittoria, ll’abbraccie, e ‘e vasilli
gia’ ‘o juorno appriesso se sentevano ‘e diasille
cantate a’ chi se facette venì freva e struzzillo
pe’ ffa’ succere, apposta nu burdello e nu scumpiglio.
E cchi parla e cunosce bbuono ’o pulitichese
penzaie ca ‘sta maggioranza nun gghieve nu turnese
pecche’ commo mettett’’o culo ‘ncopp’’a cchesti seggie
doppo nu minuto mettett’’o populo, a pusteggio.
Fuieno pe’ primma ‘e tre nnuove cunzigliere
cc’appicciarono ‘o ffuco dint’’a sta vrasera
chilli ca do primmo mumento e senza farne mistero
cuntestaieno ‘o Sinneco, ‘e tre assessore furastiere.
Dicevano : ma pecche’ sta sceveta ‘nfelice,
cchiste, pe’ nnuie, ss’hanna fa’ ’a valicia,
seno’ nuie ca stamm’a ffa’, stamm’ a guarda’
tre furastiere ca cumannan’’a Citta’ ?
E ppo’ : addo’ s’’e visto maje ca ‘a casa nosta
hanna venì a cumanna’ tre zucagnosta,
simmo nuie ca tenimm’’o deritto ‘e annummena’
chi add’ave’ ll’unore d’amministra’ chesta Citta’.
E dicevano ancora :
st’ Amministrazione e’ comm’’a nave ‘e Franceschiello
addo’ ‘a prua se combatteva e a poppa nun se sapeva,
cca’ ‘a capa ffa’ na cosa e ‘o cuorpo ne fa’ ‘n’ata
percio’, Sinneco, ‘e ccarte hann’a essere ammiscate.!
E ll’upposizione, sfruttanno chillu lamiento
diceva ca ne’ ‘a capa e nne’ ‘a cora stevan’a ffa’niente,
diceva : ‘st’Amm.ne pe’ Capua e’ nu flagiello
e ‘a sfutteva dicenno : stutate sunt lampiuncielle .!
Pure Chillemi, ‘o dirette cuncurrente do generale
dicette : ‘o populo ss’ha fatto stu riale !
Cca’ nun se sente ‘e movere manco na refula ‘e viento,
stu sinneco nunn’e’ ccosa , e’ lliento e pure assiento.
Ma chill’ate , fedele, fin’’a morte, a ‘o Generale
dicevano ca p’e primme tiempo chello era nurmale,
dicevano : date fiducia a ‘stu sinneco, cari cittadine ,
po’ se verarra’ ‘a fine sì e’ ppovere o farina.!
Ma Centore, tuosto, tiraie p’’a strata soia
e mettette a ’e ttre ribelle rint’’a salamoia,
e le rispunnette ca pe’ ‘n’at’anno sano
fosse fatt’a mmeno ‘e assessore capuani .
Sta dichiarazione scetaie ‘a maledizione
chella ca dint’a ‘st’Italia castiga ll’istituzioni,
ma che e’ ssempe stata praticata da ‘e pescecane capuani
chille ca te sapevano i’ ‘nculo a mmano a mmano!
Fuie allora che accummenciaie ‘o bbraccio ‘e fierro
tra ‘o Sinneco e cchi pruvucaie ‘o butiferro
fino a quanno ‘e tre magge a ‘ntrasatta
a’ quann’erano tre nn’addeventaieno quatto.
E quanno stu burdello iette ‘ncopp’’e ggiurnale
facette capì , subbeto, a Eduardo, ‘o Generale
cca si nu stutava ‘o ffuoco ca steva sott’’a paglia
si fosse fatte ampressa, pur’isso, arme e bagaglie.
Doppo ca ‘e quatte se jucareno ‘sta carta
‘o Sinneco, custretto, nn’avetta piglia’ parte
e pe’paura ca ll’arbero puteva perde ‘e fronne
penzaie ‘e stuta’ ‘o ffuoco e tutt’’a baraonna.
Nun ce durmeva ne’ notte e mmanco ‘nt’’a cuntrora
e quanno ll’aumentaieno ‘e penziere e ‘o vattecore
decidette ‘e ferma’, subbeto, ‘o tir’’a piccione
ca le fosse custato ‘a faccia e pur’‘a pultrona.
Fuje accussì ca scampaie ‘e esse crucefisso
ma pruvucaie, senza vule’, nu bbrutto eccrisse,
fuje accusato da cchi steva contr’a cchillo baratto
ca ss’era miso appaura ‘e na bbotta int’’a bbuatta.
E cu calma e correttezza ‘o gruppo, do 3 luglio,
pe’ stuta’ ampressa e nn’alimenta’ ‘o subbuglio,
dicette ca ce vuleva nu bbuono cagno ‘e passo
si ‘o sinneco vuleva evita’ na crise e ‘nu scunquasso.
Cca’ ’a prucessione nu cammina e ‘a cera se struie,
se nun ce dammo na mossa ce starra’ ‘o fuie- fuie,
tutta Capua e’ scuntenta, criteca e se lagna
dice ca simmo ‘a societa’ ‘e Pettulanculo e cumpagne.
Po’ dicette Maurizio ma senza malizia :
‘A criatura nun prumettere e a ssanto nun fa vuto !
‘E prumesse fatte vanno mantenute,
‘o populo cc’ha miso ‘ncopp’a’ bicicletta
e, mmo’, ssì nu pedalammo addeventammo na macchietta.!
E fuie da chillo mumento ca triunfaie na finta pace
e aumentaie, silente, ‘o ffuoco sott’’a vrasa,
nu fuoco ardente, susciato dall’ upposizione
ca se sonna notte ‘e juorn ‘e fa’….‘o ribaltone.!
Mentre fa’ finta ‘e fa’ ‘o cana arraggiata
vva’ cercanno, notte e ghiurne cocche pecur’ azzuppata
ca ppo’ mettere ‘a benzina dint’’a cchella vrasa
pe’ ffa’ zumpa’ a Centore e cu isso tutt’’a casa.
Ma chisto e’ ‘o ruolo cc’adda fa‘ ll’upposizione
ca a Capua nunn’e’, certo, ‘n’armata Brancaleone,
ce stanno assettate cinche – seie bbuone vurpune
ca teneno ‘e bbaffe luonghe e due metre ‘e pecune.
Pure Frattasi, ca e’ perzona assaie seria,
quanno le vene, lle canta ‘o miserere,
dice ca chesta e’ na maggioranza litegiosa
ca nun dda’ pizzeche e nun ffa’ manco pertose.
E’ na maggioranza suttumessa e pure mesteriosa,
ca, ogne tanto, quanto le pare, fa’, ‘a zita cuntignosa,
e’ schiattosa, e’ regnulosa, e’ pettemosa
e pe’ gghionta ‘e ruotolo e’ pure buriosa.

 

  

 

 

Pe’ cchesto tra ‘o Sinneco e chesta nova squatra
pare ca , tutt’’e juorne, se pazzeia a gguardie e latre,
ce sta’ chi ss’ annasconne , chi sura p’’a fatica
e cchi pe’ se sazia’ se magna pur’’e mmulliche.
Ma sta maggioranza ca sta’ dint’’o squnquasso
e che pe’ tira’ a campa’ ffa’ ll’arte ‘e Michelasso,
ha miso ‘a vice sinneca Carmela Del Basso
a sciogliere ‘e nudeche che stanno int’’a matassa.
E ‘a povera Carmela pe’ tene in vita sta babele
tutt’’e juorne tesse e sfila mille ttele
pe’ ffa’ accumparì ‘sta specie ‘e maggiuranza
ca pp’essa, pero’, nu ttene maie crianza.
Ll’arrivano accuse e frecciate avvelenate
da rint’’a stessa nave ca e’ gia’ mmeza affunnata,
sso’ ‘e ssolete frecciate ca sso’ scuccate a undata
da cocche capo ciurma ca primma ll’ha stimata.
Ma chesta maggioranza ca gia’ ss’e’ frammentata
e ca sta’ tutt’’e mumente ‘ncazzata e appiccecata
si nu capisce cc’adda’ sta’ cuncorde e unita
quanno cchiu’ ampressa se ne varra’ ‘acito.
E tutte sti tarantelle aumentano ‘a tenzione
’arraggia e ‘a miseria ‘e tutt’’a pupulazione
che delusa e rassignata pe’ vvocca de cape bastone
giura ca pe’ Centore ce sarranno ore ‘e passione.
E ll’antrupoliane ca nun se so’ mmaie rassignate
a’ quann’hanno pigliato chella mazzata inaspettata
giurano e sacramentano, cu ‘a mano all’acquasantera
ca Centore varra’ nterra a trasuta ‘e primmavera.
Diceno : cu sta cumbricula nunn’arriva manco a Pasqua
pecche’ nun tardarra’ ca se spezza chella frasca
addo’ sso’ rimaste appisi tutte ‘e bbuone ’intiente
‘e chesta maggioranza ca nu tene ‘e guarnemiente.
Se ‘e piglie a uno a uno ‘e pucine ‘e sta cuvata
sso’ tutte alliniate e sso’ assaie determinate
ma quann’arriva ‘o mumento cc’hanna ffa’ quatrato
se guardano ‘ncagnesco e sso’ taccheriate.
Pe’ cchesto Gaetano Caputo, Presidente e ll’adunanza,
appena ll’h’addurato ha pigliat’’e distanze
e cchesto fa’ capì ca sta maggioranza scunucchiata
ppe’ llotte ‘e putere ss’e’ gia’ disintegrata.
Gaetano ‘nt’’e Cunziglie affoca ‘e tarantelle
e mette ’a pposto a ‘e cunzigliere ca fann’’e capuzzielle,
sape guida’ ‘o Cunziglio cu fermezza e discrezione
mettendo a’ aggio ‘e cunzigliere cu rispetto e suggezione.
E mmeglio ‘e nu pulitico, astuto e navigato,
sape raffredda’ ’e Cunziglie quanno so’ ‘nfucate
mettenno pace e cuncordia tra chi se pigliasse a ppalate
percio’ e’ nu Presidente amato e rispettato.
‘O gruppo do PD ca e’ ll’uneco partito
ca ll’ate cunzigliere vulessero ammanzito,
lotta, fatica e scarpeta pp’esse rispettato
da chi ‘e nascuosto le sta’ a tira’ ‘e petrate .
Di Monaco ca e’’o nuyovo delegato a’ frazione
fatica notte e ghiuorno cu amore e dedizione
speranno ‘e cuncretizza’, cu ‘a fatica e ‘e risultate,
chello ca S.Angelo ss’ha sempe sunnato.!
A Patrizia Aversano, detta votantonio,
nun lle mmaie piaciuta sta specie ‘e babilonia
fatica ma pretende attenzione p’’a Frazione
o sino’, dice, ca cu ‘e filisteie more pure Sansone .
Pure ‘a cunzigliera Affinito evita ‘e parapiglie
pecche’ Loredana, e’ na pulitica de ssette meraviglie,
masteca pulitica, se po’ dice, ‘a quann’’e nnata,
pecche’ ha tenuto ‘nfamiglia chi ce ll’ha ‘nsignato.
Pure Mario Capriolo, ca e’ de poche parole,
pur’isso, ogne juorno, porta ‘a carriola,
fatica ‘nsilenzio pe’ dda’ serenita’ e successo
a cchistu nuovo sinneco ca nu vva’ maie ‘e pressa.
Ludovico Prezioso ca’ e’ nu viecchio marpione
allerta tutt’’e juorne ll’Amministrazione,
le cunfida ca po’ murì p’’o muzzeco ‘e nu scurpione
che proprio ‘a maggioranza tene’ gia’ nt’’o manecone.!
Marianna Iocco ca se sonna, sempe, ’a Pro Loco
fatica troppo bbuono pecche’ nunn’e’ na percoca
e mmo’ ca e’ arrivato Carlo Ingicco a’ Cultura
vvo’ addemustra’ quanto vale nt’’a sta cunzigliatura.
Fabio Buglione, ca e’ comm’auciello ‘nt’’a vuliera,
scegliette, do primmo mumento, ‘e ffa’ ‘o Cimitero
ha capito bbuono cca ss’ hadda ffa’ primma ll’ossa
si nu vvo’ ca ‘e muorte se ne fuieno a’ dint’’e ffosse.!
Marisa Giacubone tene ‘a Pubblica Istruzione
e ‘a fa’, a’ verita’, cu competenza e passione,
e’ de poche chiacchiere e cerca ‘e ffa’ ‘e fatte
pecche’ e’ na cunzigliera ca manten’‘e patte.!
Annarita Vegliante, ca tene ‘a Protezione Civile,
e’ na cunzigliera ca nun lle piace ‘o scarracavarile ,
fatica cu nu surriso ca da’ bbona speranza
‘e vere’ finalmente stu Servizio senza cchiu’ lagnanze.
E sperammo ca tutte sti pruposite addeventano rialta’
o sino’, populo mio, nun ce sta’ cchiu’ niente a fa’,
decidesse ‘sta maggiuranza tutto chello ca vvo’ fa’
pecche’ Capua sta’ sfasteriata e nu vvo’ cchiu’ aspetta’.
Cca’ ‘o populo e’ nauseato, ‘a Pro Loco e’ arrebbetata,
‘e strate so’ squanquassate, ‘e funtane mute e abbandunate,
‘e tumbine so’ arrubbate, ‘o ponte sta’ sengato,
‘o sciummo e’ avvelenato, ‘e tradizioni cancellate,
‘a riviera sta’ ‘nchiaccata, ‘a villa sta’ ‘nserrata,
‘o cummercio e’ scunucchiato, ‘e magazzine stanno stutate,
‘o sport cc’avimma scurdato,‘o Museo ss’ha quase chiammata,
‘a basilica ‘e S. Angelo e’ sprufunnata,
‘o Distretto Sanitario e’ accurpato, ‘e Cimitere sso’ semp’ arrubbate,
'o traffico cc’affugato, ll’isula pedunale c’avimma sunnata,
tutt’’a Citta’ sta disperata, mmeza Capua tene ‘o suolo uccupato,
‘e tasse sul’’e strunze ll’hannu pavate,‘e scole vonn’esse accunciate,
‘e vecchie caserme sso’ scarrupate, ‘e palette nun so’ state levate,
ll’aria ’e Capua ss’e’ ttroppo ammurbata percio’ dateve na mossa e pedalate. !
E ‘nt’a stu burdello ‘e velene e iacuvelle
stann’’a guarda’, nsilenzio, ‘e 5 Stelle,
ca stanno urganizzate,pronte e gia’ ‘nquadrate
pe’ dda’ ‘a scalata a stu Cumune dissestato.
Ma ‘e 5 Stelle, a Capua fanno troppa paura
pecche’ prumetteno ‘e fa’ ascì a’ dint’’o scuro
‘e fantasme cc’hann’ arruinato ‘sta povera Citta’
e giurano da fa’ turna’, priesto, a nurmalita’.
Ll’hannu giurato e, pure, sacramentato
‘e vendeca’ ‘sta Capua ca e’ stata massacrata
e so’ gia’ sicure ca, doppo a ‘stu murtorio,
Capua ss’affidarra’ dint’’e mmane lloro.
Dice Roberto Caiazzo, ca sso’ ll’urtema spiaggia
pe’ ‘stu populo nnucente fernuto ‘nt’’o remmitaggio,
dice ca sso’ ‘e 5 Stelle ‘o sicuro salvagente
int’’a stu mare ‘e abbandono,’e miseria e sfasciamiento.
E nt’’a tutto stu burdello a a sta’ sta negativita’
almeno ‘a Pro Loco ss’e’ turnata a sceta’
pecche’ Luigi Di Cecio ll’ha sta’ a rigenera’
commo ss’e vvisto dint’‘e ffeste ‘e Natale
quando ha mannat’o ‘o populo nu bbello signale.
Percio’ Centore ‘o Cumune ‘o vulesse na caserma !
Ma sape quant’’e difficile ‘a cagna’ chesta taverna ,
ssape, ca si penza’ troppo o ffa’ ‘o Sinneco ‘e parte
dda’ ‘a suddisfazione a cchi sta’ a joca’ a dduie mmazz’’e carte!
Pecche’ nun cunusce ancora stu labirinto scanusciuto
e tene appaura ‘e nu truva’ cchiu’ ‘asciuta ,
ma quanno se tene ‘mmano ‘o filo ‘e ll’unesta’
nun ce sta’ travucchetto ca te ppo’ ferma’.!
Forse lle fa’ paura ‘sta pulitica cchien’’e ‘ntrighe
ca nun te fa’ fida’ nemmeno do cchiu’ caro amico
e ssape ca he’ tene’ bbona capa e na bbona stagnera
si te vo’ apara’ ‘a faccia e ‘o culo pe’ ddavero.!
Ma che de’ ? Tt’aggi’’a miso a penza’ ?
Pecche’ nunn’’o ssaie ca chesta e’ ‘a rialta.?
Chesta e’ ‘a rialta’ ‘e ‘sta Capua chien’’e pene,
ca proprio pe’ cchesto e’ asciuta d’’a scena.!
Ma tu me staie a sentì.? O me faie parla’ a vacante !
O forze tu te crire ca so’ malepensante ?
Allora guardate attuorno, ffa’ attenzione,
e vvire che tu haie fatt’’a fine ‘e sarchiapone. !
Guard’’a fine cc’hannu fatto tutt’’e commerciante,
centenare ‘e famiglie ca nu ponno ìi cchiu’ annante,
vetrine stutate e faccie avvelenate
figlie ‘e sta Capua ca nun lle da’ cchiu’ ‘a campata.
Tutt’’e coresso’ triste e ll’aneme rassignate
ma cchi ‘a vvo’ bene nun ss’e’ capacitato,
lotta , allucca, defende e prupone ‘a Regione
ma chi ss’adda’ move nun se manco scumpone.
Ll’uneca risorsa putevano essere ‘e surdate
ma manco a cchesto nun ss’e’ mmaie penzato,
pecche’ nisciuno ha capito ca pe’ cc’arrepiglia’
cchesta e’ ll’urtema carta ca ce putimmo juca’.
Addo’ sta cchiu’ Capua bbella ‘e na vota
chella ricca e putente Citta’ pilota
‘e chesta nobbele e antica Terra ‘e Lavoro
che ha dato a ‘e figlie suoie benessere e unore.
Tt’hanno levato ‘o Spitale, ‘a Pretura,
‘o Catasto , ll’ Imposte Dirette, l’Enel, ‘o Giudec’’e Pace,
‘o Presidio Militare, ll’ Uffici Regionale, ‘a Caserma Fieramosca
e tu, zitto, te sì fatto magna’ ‘o ….azzo d’‘e mmosche.!!!
E mmo’ lle stann’a ffa’ ll’urteme despiette,
pecche’ vonno tutte quante ca ss’arricetta,
stann’a tenta’ ‘e ss’ arrubba’ Museo e Distretto Sanitario
pe’ lle fa’ avascia’ pe’ ssempe ‘o sipario.
E ‘a tattica e’ ‘a stessa e pur’a stessa mano,
e’ chella ca facette chiurer’’o Palasciano,
pircio’ e’ na cungiura contro a’ cchesta Citta’
ca nun tene cchiu’ fforza pe’ ss’arrebbella’.
E tu ca sì ìo primmo ca ll’aviss’ave’ caro
pecche’ nun vva’ a rompe ll’ova dint’’o panaro
a tutte chillli ca dint’’e Capua e fora
‘a vonno vere’ morta pe’ cazze lloro.?
Allora, decidete, te vuo’ ‘ncazza’ si o no ?
‘O sang’osco nt’’e vvene ‘o ttiene si o no ?
‘ Ncarrate annante a sti quatte cafune
e pigliale a cauce ‘nculo a uno pe’ uno.!
Ma chi so’ sti sierve cafune ca c’hannu sempe servute
chille ca ‘e piere nuoste ll’ avimmo sempe tenute,
chille ca ce ‘nvidiavano ‘a bbellezza e ‘a civilta’
ca sulo chesta bella Capua puteva mustra’ !
Guardate attuorno e piglia cuscienza
aiuta a ‘sta Citta’ e dalle cchiu’ aurienza
pecche’ si aiute a essa aiuti a te stesso,
arape chist’uocchie e nun ffa’ cchiu’ ‘o fesso.
Mettimmece tutte ‘nsieme, facimmo uno bblocco
e pigliammo a ccauce ‘nculo e apparammel’’a vocca,
a cchi vvo’ ‘o mmale e ‘a morte ‘e chesta Citta’
facimmele vere’ ‘e capuane che sanno fa’.!
Mo’ viene acca’, strigneme forte
e giurame ca pe’ Capua luttarraie fin’’a morte,
fin’’a quanno farraie triunfa’ ‘a giustizia ,‘a liberta’
‘a pace, ‘a prusperita’ e ll’ammore overo p’’a capuanita’.
Alluntan’a te chi ll’ha rato guaie e arruina
si vvuo’ turna’ a metterle ‘o manto ‘e Rigina
e quanno ll’he’ fatto ‘nsiem’’a tutt’’a capuanita’
mittela ‘ncopp’’o ‘o trono pp’’a ffa’ turna’ a triunfa’.
Allora:
Evviva ‘o Carnevale ‘e chesta nobbele Citta’,
evviva chi ha faticato pe’ nunn’’o fa’ trapassa’,
evviva Raffaele Modugno ca ll’ha urganizzato
e ‘o Sinneco e ‘o Cunziglio ca ll’hann’annummenato.
A tte’ Capua mia amata, nn’abbraccio forte forte,
e che DDio, finalmente, te pozz’arapì ‘e pporte. !
E a vvuie cc’avite avuta ‘a pacienza ‘e sentì chesti quartine
a vvote salate e ‘a vvote malandrine
ve saluto a uno a uno, ve doco ‘a buonanotte
cu ll’augurio ca ce verimmo ‘o….. duimilaediciotto. !


Capua dal 25 dicembre 2016 al 25 febbaio 2017


Detto: ‘A mala nuttata e ‘a figlia femmena .!

VIVA CAPUA OGGI E SEMPRE !

Camillo Ferrara

 

Banner
Banner
 
Banner
Banner
Banner
Banner
Banner
Banner
Banner
Banner

Seguici su ...

facebook logogoogle+ logotwitter logoyoutube logo
Banner

Webcam Capua

Vista sul Lungo fiume Volturno

Vista Sud-Est

Newsletters










Articoli archiviati

Seguici su Facebook

Seguici su Twitter

Capuaonline.com utilizza i cookie per migliorare la vostra esperienza sul sito. I Cookie essenziali impiegati per il funzionamento del sito sono stati già impostati. Per saperne di più sui cookie che utilizziamo e come eliminarli, vedere la nostra policy sulla privacy .

Accetto i cookie da questo sito.