Le "cicuzze" di Camillo Ferrara - Pubblicazione completa

Piazza dei Giudici - Cultura ed Eventi

ferrara camillo primo pianoOi popolo beneamato,saccheggiato,arruinato,scarpesato e dissestato
'a semmana 'e carnevale,'o vvì lloco, e' arrivata
ma tu d''o carnevale ne vire sulo ll'ombra
pecche' a Capua ll'hanno mannat' all'oltretomba.

Chist'anno m'ha salvato nu sciuscio 'e "capuanita' "
sino' m'ero fatto 'a cartella e gia' stev' allaldila',
'mmece chi me vo' bbene e defende 'sta' Citta'
m'ha salvato 'mpunt''e morte e percio' me trovo cca'.

Fuje mentre me ne jevo 'a gloria 'e cardone
c'arrivaje Giacubone 'nt''e vveste 'e nu santone,
se facette largo 'nt' 'ammuina , me chiavaje nu cuppino
e me dicette " Carneva' aizate e cammina " !

E accussì me so' aizato pure si stoco struppiato
pe' tutt''e mazzate ca chist'anne aggio pigliato,
ma mo' cocche passetiello 'o pozzo pure fa'
'a faccia 'e chi me vuleva trapassat' all'aldila'.

Ma tu populo , biato, stiv'a durmi' c'a zizza 'mmocca
pecche' staje 'nfrasturnato 'e chiacchiere e papocchie !
Stann' a scava' 'na fossa attuorno attuorno a tte',
e tu nun te ne futte e 'o ppiglie a sciue' sciue'. ! ?

Ll' apatia e ll' indifferenza , ca te stann' a' 'nfraceta'
t'hanno fatto scurda' 'e guaie 'e chest' ex Citta'
ca vva' sempe cchiu' arreto e che me fa' penza'
ca chianu , chianu , chianu se vo' suicida'. !

Ma tu tiene,overamente, na pacienza a' fa' paura !
Staje 'nguaiato, arruinato, sì redotto scauzo e annuro
e acal' ancora 'a capa e nun te daje na mossa ! ?
Ma tu , overo , aspiette ca te vottano nt''a fossa ! ?

Tiene 'o sango dint''e vvene chin''e collera e veleno
e tanto ca te mantiene allerta ammalapena ,
tu ca pe' sentì 'o returnello d''a stessa canzone
haie pusat''a curona e te sì acalat''o cazone .

E mo' nun t'e' rimasto che te zuca' 'o broro
pecche' 'a carne 'nt''a tiana ss'hannu magnato lloro
e a tte t' hannu rimasto sulo 'e nierve e ossa
percio' staje cu pere 'nt''a cchella fossa.!!

Nun avisse maie penzato , manco pe' 'mmagenazione
ca putive passa' nu viernerì 'e passione
chin''e disoccupazione, 'e disperazione, 'e murtificazione
'e gassificatore , 'e Piano Regolatore e de palette dissuasore.

'E tu nunn' haie ditto niente e si' rimasto ammutulito
quanno ll' acqua vullente t' 'e gghiuta 'ncopp''a ferita ,
ma pe' furtuna toja nt''a sta Citta' chiacchiariata
ce sta', ancora , chi te vo' bbene e t'ha ammerecato.

Chella ferita aperta ca steva , gia', 'ncancrena
a' quanno te zucavano 'o sango a' dint''e vvene
tutte chille persunagge che t'hannu guvernato
e che tu avissa piglia' a caucie e a siggiate.!

E 'a ferita 'nfracetata , pe' mmezo d''o dissesto,
brucia e fa' mal' 'e sacche 'a tutt''a ggente aunesta
ca se proprio sfasteriata 'e esse salassata
e de pava' pe' furbe e pe' raccumannate .!

E 'a cca' ca e' accummenciata na guerra gia' annunziata
tra 'o Palazzo dissestato e tu popolo 'ncazzato
pe' colpa d''e cundizione d''a vita 'e sta Citta'
ca t'hanno fatto passa' tutt' 'a voglia 'e campa'.

Tutto sta' murenno, senza nisciuna escruzione
e pe' gghionta ce s'e' mmiso pur''a recessione,
stamm' 'e piere 'e Pilato , stamm' arruinate ,
simmo muorto avvermecato, simmo n'arbero seccato.!

Pur''o cummercio , ch'era 'a forza 'e 'sta Citta',
s'e' redotto pelle 'e ossa e sta' quase a trapassa',
ma nun dammo 'a colpa sul''e signure commerciante ,
ma a cchesta Capua sbaliciata ca e' rimasta vacante.

Pe' na cungiura antica c' hanno rapinato
'e chello ca tutt''e juorne ce purtav' 'a campata,
'o Spitale Palasciano, 'o Giudice 'e Pace, 'a Pretura,
e tutto chello ca s'hanno futtuto a' dint''o teraturo.!

E nun s'e' fatto maje niente e niente s'e' sturiato
pecche' ll'economia fusse salvaguardata,
ma tutte, tutte quante se ne so' strafuttuto ,
finche' simmo jute 'nfunno e po' simmo fallute .!

Nu panneciello cauro e' stato, pure , tentato
'a piazza Etiopia , addo' stev' 'o mercato
ma e' rimasto sulamente nu vano tentativo
pecche' a' fine e' risultato sulo nu palliativo.

Ce stevano 'e bancarelle 'e poche curaggiuse ,
capofamiglie a spasso e pure bisugnuse ,
ma nunn'hanno resistito manco ddoje semmane
pecche' nunn' hanno vennuto nemmeno na patana !

E chisto e' 'o signale che renare nun ce ne stanno
e che 'a ggente nun spenne pecche' se mor''e famma ,
stammo cumbinate peggio d''e tiempe 'e guerra ,
c' hanno miso a tutte quante c''o culo pe' 'nterra.!

Dice 'n' antico ditto " doppo Natale friddo e famma "
ma a Capua ce murimmo 'e famma 'ncap''e ppiero all'anno ,
percio' simmo destinate a sagli' 'ncopp''a nu scanno
e a chiurere 'sta vita 'e mmerda cu nu chiappo 'ncanna.

E cchisto e' 'o destino niro ca tenevamo astipato
a' quanno s'e' 'mballata 'a rota e ce simm' accapputtate,
durante 'a scopa nova tenevamo bbone speranze
e ne caccia' 'mparanza mangianza e ordacutanza.

'O turismo, che fosse stato 'a ricchezza e' 'sta Citta'
ce puteva da' 'n'avvenire e ce puteva fa' campa'
ma nunn'e' decullato 'nt''a 'sta Capua murtificata
pecche' nisciuno signor''e turno se n'e' preoccupato .

Ma mo' te faccio na domanda e te mett''a penza' :
ma chi c 'hadda veni' a visita' chesta Citta'
si 'e cchiese e 'e monumente ,ca ne tenimm' 'a sporta ,
teneno , quase tutte quante ,'o palo aret''a porta.?

E tutte 'sti ricchezze, cu na storia senza fine ,
puzzano 'a nu miglio 'e mmunnezza e d' urina
pecche' 'e patrune d''a notte, ca nun so' degn''e campa',
ce vanno a piscia' ' ncoppo e 'e vanno a' ultraggia'.

Pur'''a lampa 'e Cadute e' stata squnquassata
o a' nu bbuono figlio 'e femmena allentata
o quacche persunagge bbuono 'mbumbazzato
'e borotalco sniffato c''o zito spezzato.

Chesta e' ll'uffesa cchiu' grossa fatta 'a 'sta Citta'
pecche' chi e' mmuorto p''a Patria nun s'hadda ultraggia',
chi ha fatto 'stu misfatto nun se po' perduna'
pecche' 'e Cadute so' sacre e nun ss'hanna tucca'.

'E funtane ch'eran 'a bannera 'e 'sta nobbele Citta',
so' redotte zitte e mute pecche' 'n'hanna parla',
ma si putessero dicere sulamente na parola
ce mannasser'a ffa' 'nculo pe' dint''e cannole.

Na vota erano ll'urgoglio e ' o brio 'e 'sta Citta',
po' so' state chiuse e nun se po' appura'
pecche' chesti funtane che devano allerezza
so' state relegate, a deposite 'e mmunnezza !

E nun parlammo po' de penzile ciardine
c'adornano 'e torre , 'e cupole e 'a Riviera Casilina
addo' 'e piante 'e fiche t'arrevotan''e 'ntestine
specie quanno 'e vvire 'ncopp ' 'e cartuline.

Tutt''e tumbine 'e Capua nun teneno cchiu' 'e grate
pecche' all'ora 'e notte Lupin ss'arrubbate
e cocche anema bbona pe' nun ce fa' care' a nisciuno
c'ha miso bidune , mazze e pure cocche scarduno.

'E vvie Ottavio Rinaldi e S . Michele a Corte
aspettanno 'a tiempo 'e cagna' sta malasciorta
pe' se trasferi', pure lloro , dint' a' civilta'
visto ll'immensa storia ,ca stann' a rappresenta'.

Certamente ce vuleva nu poco 'e cchiu' 'e riguardo
pe' ll'antico quadrilatero 'e Capua longobarda
ma chesta e' na Citta' ca nun tene cchiu' memoria,
pecche' s'ha scurdato chi ll'ha dato unore e gloria.

So' anne e anne ca all' entrata d''o mercato
s'e' scassat''o pavimento e s'e' criato na fussata,
addo' io ce mettesse , quanno chiove a catenelle,
o na coppia 'e pecchie mute o na mostra 'e barchetelle.

Ma si ce vann'ancora a deposito 'e pulmanne
priesto addeventa piscina tutta piazza d'Arme
accussi' quann' estate , 'o llunerì a' matina ,
ce iamm'a ffa' 'o mercato c''o custume e cu 'e bikine.

Accussì' ce truvammo 'a piscina Comunale
chella ca 'a vint'anne ne parlano 'e giurnale,
chella ca pe' giuvene ava esse nu signale
forse e' stata sulo nu scherzo 'e carnevale !

'A ditta d''a mmunnezza ha voglia 'e fatica',
si faticasse notte e juorno nun putesse maje arriva'
a leva' tutt''a mmunneza che 'a ggente 'ncivile
votta pe' tterra 'e vvie facenno nu purcile.

Ma appriesso 'a mmunnezza 'sta ggente 'e pupu'
ietta pure tutto chello ca nun lle serve cchiu',
e 'o ghietta a tutt''e ll'ore 'e notte e pur''e juorno
mettenne 'nfaccia a' Citta' 'o russo d''o scuorno !

Ll''antica Porta 'e Capua , e' vittima designata
d''e solete che c''a vernicia mannan''e mmasciate
all'amante e 'e 'nnammurate quanno stann' appiccecate
'nchiavecanno cchiese, monumente, e case private.

Mannano 'e 'mmasciate cu 'e vernicie rosso o blu
tutte 'sti spasemante ca nun sanno parla' cchiu',
pecche' si vuo' bbene a' na femmena o te ce vuo' ì a cucca'
c''o vvaje a dicere 'nfaccia mmece do pitta' !

Si nun ce sta' cchiu' respetto pe' monumente nuoste
a' parte 'e cchi ll' ultraggia pe' se mette 'mmostra
s'hanna piglia' pruvvedimente a' bott''e cravascia
sino' 'stu scrigno d'arte , fernarra' 'nt''o sfascio.

Pe' tutte 'sti mutive e p''a mancanza 'e renare
campammo , tutte quante , jurnate triste e amare
pe' ccolpa d''e Signure , da primma e 'a sicond'ora
c'hanno penzato notte e juorno sul' 'e cazze lloro.

Inzomma avimma canta' na sfilata 'e diasille
accummencianno d''e gruosse e fernenn' 'e piccerille ,
cantammancelle 'nfaccia , redenno e pazzianno,
a chesti Dracule nustrane e a tutt''e mezacanne .

Apprufittammo ca 'sti jurne tenimm''a dispenza
e dammele 'ncuollo , senza riverenza,
levammece a' faccia 'sta maschera 'e sufferenza
e tenimmece 'o cappiello annante all' uscellenza.

Ma facimmo primma na cosa , penzammo a cchesta festa
ca ha perzo,pur'essa, 'a tiempo, 'a vecchia via maesta
pe' ccolpa 'e na bbona morra 'e finte mast''e festa
e de paricchie persunagge nate cu 'e mmane leste.

Hannu vuttat''a preta e se so' annascost''a mano
tutte chille ca nun le cunvene 'e fa' chiurere 'a funtana ,
percio' hannu fatt' 'a guerra mettennese 'nterzetto
contro a cchi ll'ha levato vocca a' sott''o rubinetto.!

E mmo' 'a 'stu Carnevale, vuie, ca v'aspettate ?
Mo' ve dico tre ccose accussi' ve rassegnate !
'O Cumune e' falluto e sta' risperato !
Ll'Acage , chianu chianu , e' stata 'mbrigliata !
E 'a Pro Loco nata ancora dint''a ll'acqua 'nquinata !
Chisto e' 'o responso, percio' vv'arrangiate !

Quanno stevo deposistato int''a sala mortuaria
tiseco 'ncopp'a preta , annuro e sulitario ,
nisciuno me se chiagneva e me diceva na prejera
a fora a ddoje capere e a quacche facenniere .

Attuorno 'e fredde spoglie sulo poche perzone
chille ca nun vonno fa' murì tutt''e tradezione,
Carnevale era n'emblema ca steva pe' gghì distrutto
e nisciuno se ne futteva 'e chillu grave lutto.

Mentre se preparava 'a prece p''o funerale
'o sottoscritto,dato pe' muorto, dette nu signale,
pecche' nu persunagge venuto a me salva'
me purtaie 'a mmerecina pe' me fa' turna' a campa'.

Nun me dette tutt ''e fforze ma almeno ll'assenziale
chello ca me serveva pe' ffa' 'o speziale ,
pe' dda' nu poco 'e gioia a tutte 'sti criature
e pure a cchella gente ca nun caca 'o fasciaturo.

" 'O Carnevale era d''o populo e 'o populo hadda turna'
- accussi' Franco Fierro se sentett''e 'ntruna',-
dicette : miercuri' d''e Cennere , commo s'e' jurato,
ss'hadda urganizza' 'o Carnevale commo c'hannu tramandato.!"

E chella e' ll'uneca ricetta ,si vulimmo recupera'
'sta festa ca e' patrimonio 'e tutta 'sta Citta',
ognuno ca sente 'e esse vero capuano
si facess'annante e venesse a dda' na mano.!

Ma mo' chiossa' ca t 'ha astipato pe' chesti jurnate
'stu cumitato arrepezzato dint''a na serata
tra 'e chiacchiere e 'e inciuce de 'mpustatore 'e parte
chille ca jocano sempe a ttre mazze 'e carte.

Ma chest 'e' na storia vecchia ca sapimmo a memoria
chella ca , 'a quann''e nnat''o munno , se chiamma pappatorio
e che a Capua fernarra' sulo quann''a " capuanita"
scenne mmiez''a via e 'e manna a gghì a zappa'.

Speramm''o Pataterno ca sotto nun ce sta' 'o trucco
e nun c'hanno pigliato pe' tante babalucche,
pecche' mo' e' 'o mumento 'e ne caccia' 'e cantastorie
c ' hann' arruinato sta festa , mannannela 'o priatorio .

Chiossa' si ce sta' 'a speranza , ca fora 'e galiota ,
'o carnevale , po' turna' bello comm''a na vota ,
pecche' e' uso a' anne 'e fa' na festa 'e chiazza
c''a strafuttenza d''e Pilate ca stanno 'ncopp''o Palazzo.!

'A colpa 'e de chi nunn' ha vuluto, maje , senti' cunziglie
forze pecche' le piaceva 'e cumanna' 'a quatriglia
o pecche' facenn''o gnorro e 'o scarracavarile
'e 'sti juorne te faceva 'a barba c''o pilo e 'o contrapilo .!

Ma chiossa' sta festa 'e piazza a cchi maje cunvenette
e 'a cchi 'a penzaie allora , 'nt''e cerevelle che lle jette.! !
Ma forze accussi' aveva i' e accussi' ss'aveva fa',
pecche' 'o ciuccio teneva famma e ss' ava da' a magna !

E mentre e' gghiut' annante , chesta mala facenna
'o ciuccio s'ha magnato gia' quintale 'e vrenna,
mentre 'o Carnevale ss'e' talmente assecchenuto
ca tene ll'ossa 'a fora e e' pronto p''o tavuto !

E chisto 'e 'o risultato, ca tenite annant''a ll'uocchie,
chello ca ve rimane doppo trentanne 'e arruocchio
e si' continuammo a ffa' ancora 'e surdemute
pure 'o Carnevale , sarra' priesto perduto .

Sciacqua Rosa e bive Agnese ca nce sta' chi pava 'e spese
accussi' cuncertava chillo ca mo' fa' 'a parte lesa,
e chi 'sta manifestazione ll' ha redotta nu bidone
addo' se jettavano 'e renare d''o Cumune Pantalone !

E s'e' mmaje preoccupato stu cumune mecenate
'e cuntrulla' si e' ascev''o grasso a' for''a pignata?
E ha maje cundannato chi ha distrutto na manifestazione
ch'era 'a rigina assuluta 'e tutt''o meridione .?

E chiossa' se penza chesto pur' 'a vatta sulagna ,
e verimmo si' pure stavota stappan''a champagne,
verimmo si 'e ccose so' overamente cagnate
o e' stato sulamente nu cagno 'e facciata!

Pecche' chiagnenno, chiagnenno ce vann''o servizio
'e discepule d''e maestre d''a cannuritizia
e appriesso a cchisti cca' 'e cunfrate cunsuciate
'o miercuri' d' 'e Cennere se so' semp' arrefrescate!

E accussi' c'hannu distrutto na festa naziunale
facennela addeventa' carnevaniello riunale
e 'o furastiere 'ncantato ca venev' a se 'mpara'
mmo' c'ha miso sotto e ce sta' pure a 'nsigna'.

Si se scetassero Scardino, Gaglione , Marchisano
'o Scucchione , Sarchiapone, Giugno, Femiano
Cirillino e chille ca sta' festa 'a facevano rigina
se purtassero, mo' stesso , a' via Cappuccini !

So' cchiu' 'e sissant'anne ca pe' sustegno a' festa
se sente semp''e parla' 'e na scola 'e cartapesta
ma e' stata sempe e sulo na bbona prupaganda ,
e n'ammiscata 'e carte d''e solite musicante .

'O Carnevale 'e Capua era uneco e sfarzuso
ma semprice , geniuso e nunn'era carestuso
ma tutt''e tradezione belle 'e chestantica Citta'
moreno sempe pe' mmane 'e chi n''e sape mania'!

Ma mo' nun scenne cchiu' d''e zizze d''o Palazzo
'o llatte ca careva , justo , mmiez''a 'sta chiazza,
e' fernuto 'o tiempo bello, 'o tiempo d''e vacche rasse
e de tutte chille puorcie ca mo' portan''a sciassa.!

Mo' che 'o pizzo cchiu' friddo e' 'o Cumune fuculare
ha fernuto 'e se scarfa' chi faceva 'o paro e 'o sparo ,
nun ce sta' cchiu' Pantalone ca lle porta 'a bbiava
percio' mo' allucca , sbraita e sta' cacciann' 'a bbava!

E chesta e' ll'eterna storia 'e sta Capua sfurtunata
ca nun se decide maje a fa' passa' 'a nuttata,
se n'e' sempe strafuttuto ma e' accussi' ca s'ha jucato
'e cchiu' belle tradezione ca teneva astipate .

Ma mo' hadda cagna' 'a musica e hadda ferni' 'sta storia,
hadda ferni' 'a cazzancularia e tutt ''o guazzatorio
int''a 'sta festa nosta , redotta a nu murtorio
e che e' stata pigliata a' sempe pe' nu refettorio.
Percio' tu nun ce credere e nun fa' sempe 'o piro,
pecche' tu haie crerere sulamente a chello ca vire ,
'e cchiacchiere e 'e pruclama nun ce i'cchiu' appriesso
sino' care nt''a tagliola 'e chi te vo' fa' fesso.!

E io si t''o ddico e pecche' cunosco tutt''a storia
'e chesta che fu na festa , austera e chien' 'e gloria
fino a quanno, nu bbello juorno, se sciuglietter''a capezza
e' fuje jettata, apposta, 'nt''o sicchio d''a mmunnezza .

E 'a tanno e' sempe peggio, e' sempe cchiu' arrunzata
sta festa 'e Carnevale 'nt''a sta Citta' affunnata,
se va sempe cchiu' arreto , se va sempe cchiu' abbascio
e nisciuno se ne fotte 'e tutto chistu sfascio .

Chesta 'e na Citta' senza cchiu' disciplina,
e' na Citta' sbandata ca 'ntene cchiu' duttrina,
era nobbele e mmiriata ma pe' fa' 'o doppiopasso
paricchie ll'hanno purtata deritto dint''o scasso !!

E lla' ll'hanno smuntata e se ll'hannu pure vennuta ,
'a piezzo a piezzo , na chiorma 'e allancanute,
nun c'e' rimasto niente, s'hanno bbona spurpata
e ll'hanno redotta, 'a fora peccato ,comm' Addulurata !

Ha fatto stracqua, strutto e pure 'o culo rutto
pe' colpa d''e facenniere e dell' assepigliatutto
ca ll'hannu ncannaruta , ce ll'hannu miso adereto
e mmo', quanno 'e all'urtemo, diceno che fete!!

'O capuano, a' tiempo , ha perzo 'a "capuanita' "
e pe' nun ss'arrebbella' s'e' fatto spuglia',
nun tene cchiu' ricchezze , e' povero e acceppecuto
e cchi ha capito chesto ha pigliato e se n'e' gghiuto.

Tanta figlie 'e Capua so' addeventate furastiere
pecche' nt''a casa lloro erano priggiuniere,
priggiuniere 'e na vita ca ll'aveva condannate
a' nu dimane senza speranza e chin''e bidunate.

Tutto e' gghiuto perzo, 'a storia e 'a nubilta'
e chesta grande Rigina 'e tantu tiempo fa',
se ll'hanno jucata, lloro, 'nt''e ggire 'e sottamano
finche' nun s'hanno vennuto pur''e... capuane !

E mmo' addo' vulimmo i',che vulimmo fa',
nun c 'e' rimasto cchiu' niente ca ce po' salva',
nun cuntammo niente,nu tenimmo cchiu' parola
'a quanno avimmo visto 'a luna 'nt''a bagnarola !!

E so' anne,anne e anne ca va annante chesta storia ,
a' quanno ascette mmmiezo 'o mbruoglio e 'o guazzatorio ,
a' tanno fuje signata pe' nnuie 'a malasciorta
chella ca mo' c'ha purtato deritto 'mbracci' 'a morte.!

Avimmo sempe pigliato 'a sputazza p''a lira argiento,
simmo state 'ngannate e viulentate a trademiento,
c'hanno saputo fottere e c'hanno saputo arravuglia'
finche' a 'sta povera Citta' ll'hanno fatta schiatta'.

Int''a nu mare 'e diebbete Capua nosta e' affugata
fatte,a anne e anne a' chi t' ha raggirato
cu nu mare 'e chiacchiere e cu mille prumesse
pecche' t ' ha cunziderato, sempe, carta p''o cesso !

Ma mo' ca te si' scetato e haie capito 'a jucata
se stanno a pallia' pe' vere' chi t'ha 'nguaiato,
uno dice e' stato chillo e chillo dice 'e stato chill'ato
ma intanto haie pava' tu , povero disgraziato.

Allora hadd' asci' fora chi ha fatto 'o juoco 'e sponna,
chi t'ha prummiso 'e avvera' speranze e tanta suonne ,
chi t'ha trastulaiato vennennete oro 'e Bologna,
e chi s'ha magnato 'o prusutto e a te t'ha rato 'a 'nzogna!

Ma mo' c'hannu sfasteriato e c'hannu fatto 'e ppalle
grosse e tale e quale comm'a casecavalle ,
avimmo perz''o cuntrollo , 'ntenimmo cchiu' pacienza
e nun simmo cchiu' disposte all' accunnescenza .

Ma damme pane a pane e dammo vino a vino,
se sa' ca 'sta Citta' e' cchiena 'e trafechine
percio' quanno ce cammine accuorto p''e tagliole
e aparate 'o dereto cu na bella stagnola!!

'A meglia parola e' chella ca nun se dice
percio' attuorno a 'stu quatro mettimmece 'a curnice
e po' appennimmela justo mmiez''a chesta chiazza
pecche' e' 'overo posto d''e juoche e ll'intrallazze.

Percio' io quanno penzo a tutt''e tribulazione
ca t'hanno rato 'e confraternite d''o tozzabancone
me saglie a' dint''a ll'anema arraggia e rebellione
pecche' nun si' capace 'e caputa' stu baraccone. !!!

Ma dice nu ditto antico , tramandato a' pate a figlio
ca chi va' pe' mmare chiste pisce piglia ,
percio' tu sulamente si' ll'autore 'e chillo quatro
e tu e sulamente tu puo' fa' ferni' 'o tiatro.!

Quanno te chiammarranno all' urne pe' vuta'
statte bbuono accuorto addo' cazzo vaje a para'
pecche' chillo pe' tte' e' 'o mumento cchiu' 'mpurtante
pe' ll' avvenire tuoio e de chi puort' annante.

Nun te fa' fotte cchiu' , nun te fa' 'mpapucchia'
sino' 'o puparo 'e turno te porta a passia'
quanno staje 'nt''a gabina affidate 'a cuscienza ,
siente ca te dice e doppo dalle aurienza .

Pecche' sul'accussi' se po' cagna' 'sti' Italia
ca e' 'a patria assuluta 'e tutt''e baccanalie ,
primmo c'hanno zucato, po' c'hannu 'nguaiato
e se permettono pure 'e darce ''e sciamarrate.

E mentre nuje suffrimmo pe' tira' a campa'
lor signore 'o parlamento se stann'a svizia'
lla' se magna ,se veve e se fann''e stirature
mentre a nnuje c'hannu miso int''o macenaturo.

Tutta ll'Italia ,ormai , e' comm''a Roma capitale
fa' cunto ca e' na tavula cu nu bello mesale
ca e' longa ,longa assaje, comm'a tutt''o Stivale
addo' ss'assettano sempe 'e stesse cummenzale .

Chille ca s'hanno magnato fabbriche e spitale
d''o Nord fin''o Sud 'e sta povera Italia
hanno menato mmiez''a via miliun''e capofamiglie
mentre lloro magnano,veveno e se fotteno 'a muniglia!

Inzomma 'o quatro e' niro ma niro niro assaje
e 'o sole , si jamm''accussi', nun vedarrammo maje
ma cu tutto ca a Capua se fann''e capriole
ogne tanto accumpare cocche squarcio 'e sole !

Pecche' ' a 'sta Citta' strafuttente e appecundrosa
ll ' ha levato nu sciaff 'a faccia " Capua speciosa ",
Gianmaria Modugno, pe' ffa' unore 'o casato
ha resuscitato na cannela ca s'era gia' stutata.

'A cannela e' ll'antico Tiatro - Cinema Ricciardi
ca s'era stutata pe' nu paro 'e busciarde
ll' 8 'e decembre s'e' turnata 'allumma'
grazie a 'sta famiglia chien''e "capuanita".

Pure don Carlo , ca mo' sta' 'mparaviso,
ten''o cor cuntento e se schiatt''e risa ,
e pecche' e' stato 'e Capua cittadino amiroso
preia pecche' 'o Ricciardi torna ancora glurioso.

Na scola eccellente ca nun varra' maje a picco
e' 'o Liceo Garofano 'e Giuvanne Di Cicco
ca l'ha dato na svolta e 'o sta' facenno vula'
pecche' tene Capua 'nt''o core e 'a vulesse aiuta'.!

'O Museo d'Arte Cuntempuraneo mo' s'e' assestato
pecche' tene nu Cunziglio chiu' equklibrato,
l'architetto Ciambrone fatica d'amorcunzente
c''a Capriglione ca e' nu cavallo vincente.!

'A prufessuressa Capriglione, assesore 'a Cultura
ha fatto nascere a Capua n'ata bella criatura
'o 31 gennaio ha purtato a battezza'
'a sede 'e ll'Univesita' d''a Terza Eta'.

'O patrino 'e 'sta criatura e' Camillo Ferrara ,
chillo ca 'nt''o cunziglio faceva 'o paro 'o sparo
chillo ca e pe' ffa' 'e juoche 'e dduie,tre pupare
e ' gghiuto a fernì pur'isso 'nt''a picciunara.

'O premio S.Agata e' gghiuto 'a Tonino Citarella
'o mideco ca fa' bbene 'a gente puverella ,
chillo ca vo' bbene Capua cchiu' 'e isso stesso
e che 'a vo' Rigina , quanno cchiu' ampressa.

'O Sport ,'nt'a 'sta Citta', fatica c''o silenziatore
pecche' 'o port'annante chi ce ten'ammore
so' persunagge, serie, oneste e silente
ca faticano zitto zitto, senza fumiente.

So' Alfredo Aglione e Michele Vittorelli
ca 'o portann annante cu 'e mullechelle,
so' dduie figlie 'e Capua,semprice e laburiuse,
che hanno dato 'o Sport risultate prestigiuse.

'A Cattedrale 'e Capua ha miso bbone scelle
'a quanno don Gianni s'ha mis''o manteseniello
e c''a fatica', c''a serieta' e cu tanta umilta'
sta' facenno na Cattedrale ca e' tutt'a' guarda'.

Dammele na mano a 'stu parrucchiano
ca sentite a mme', e' nu degno capuano,
fatica comm'a ciuccio pe' cchi nu po' campa'
e spenn''a vita soia pe' fa' 'a carita'.

Pure chist'anno e precisamente 'o 2 'e maggio ,
a Dio vulenno ce darra' 'n'at' assaggio ,
ce starra' 'a siconda prucessione d''e statue d'argiento
ca pe' Capua e' addeventato 'o cchiu' bell' evento.

E' chesta 'a bbona via ca s'hadda piglia'
si,overamente,vulimmo salva' 'sta Citta',
si fossero tutte quante, comm'a don Gianni
Capua gia' stesse nu seculo annante.

'Mmece parlammo,parlammo e nu mmaje quagliammo
pecche' nun ce sta' 'a vulunta' d''e cap''e lignammo ,
putessemo sciala' c''o turismo 'e massa
ma nun simmo capace 'e sbruglia' 'sta matassa.!!

Percio', chesta Citta' mo' e' na povera crista,
pe' colpa 'e ll'incuria 'e na massa 'e affariste,
era bella e putente chesta bella Capua mia
ma nun ll 'ha salvata manco 'a mano 'e Dio.

Pecche' 'o Pataterno niente c'ha ha pututo
pecche' ha sempe ditto " aiutate ca io t'aiuto"
ma tu si stato strafuttente e a' vvote pure vile
percio' 'a vita toia sta' a gghì 'mpilo mpilo !

E mmo' ca s'avvicina 'a recoveta d''e vote
'e aulive ncopp''a ll'arbero ne truvarranno poche
e pe' chello poco d'uoglio ca ce ponno fa' scula'
se stanno gia' a ffa' 'a guerra pe' cchi s'hadda piglia'.

Ce starra' 'a reazione 'e chi fuje 'mpallenato
proprio quanno 'o traguardo ll'aveva tagliato
percio' 'st'elezione sarra' 'a bbona uccasione
pe' cchi' se sta' a' esercita 'o tir''a piccione.

Ce sta' pure chi 'a paricchio tene 'ambizione
'e cuntrasta' 'e seguace 'e Berlusconi
e sara' sicuramente n'ata guerra a' ultranza
cu cchi gia' s'e' schierato c''a nova paranza.

Gia' st'armata dint''a 'ntrincea 'a cuvata nova
chella ca tene 'o fine 'e lle i' a rompe ll'ova ,
so' tutte nove leve ca tenen''a cerevella
'e fa' zumpa' , pe' sempe,'o viecchio bancariello.

Diceno ca e' venuta ll'ora 'e ne caccia' 'e mercante
a' chist ' antico tempio ca 'e chin''e chianto ,
pecche' chello che nasce , pe' fforza hadda ferni'
e pecche' liscie cierte ccose, 'o Pataterno 'n'e' fa' i' !

Percio' statt' accuorto a cchi t'alliscia e te fruscia
accattete 'o rafaniello ca tu gia' cunusce,
'o riesto nun ll'haie da' retta e nunn' haie penza'
si nun vuo' fa' 'a vallina che s'hadda spenna'.

Ma ce starra', sempe , na parte 'e sta Citta'
ca se venne 'o dimane sulo pe' gnurantita'
e' 'a ggente ca passa 'a vita c''o damme e donco
e nun se ne fotte si 'a Citta', po', rimane cionca.

Ma c''o populo serio nun ss'hadda pazzia'
pecche' mentre te pienze ca t''o staie a trezzia'
si sulo se ne accorge ca 'o staje a piglia' pe' miulo
te manna ,senza misericordia, a gghii' a fa''nt''o culo!!!

E nun te ce manna pecche' e' asciuto pazzo
e' pecche' se vede ca ll'haie rutto 'o ....azzo
pure quann'o scarpise e le faje na carugnata
te fa' pentì , all'istante , 'e quanno si' nnato.

Troppe 'ntrighe e appicceche lla' so' succiese
e quann''e stata 'a fine c'haie fatte tu 'e spese ,
'o Cunziglio a' troppo tiempo e' stato zavurrato
'a quatto, cinche pise ca po' ll'hann 'affunnato.

Dice sempe n' assessore', ca nun se ne fott''e niente,
ca Capua e' migliurata , e' vola comm'o viento
e ca isso se ne vanta , ma nun sape 'o cetrulo
ca 'o viento ca ll'addecrea a nnuie ce va' nculo!

Ma nun se po' sta' sempe a ggalla comm'a ll'uoglio
se sa' ca quanno e' autunno hanna care' 'e ffoglie
e cca' 'e passato ll'autunno e stammo int''a vernata
percio' 'o meteo prevede , na bbona sfrunnata .!

E siccome doppo vierno vene pure 'a neva
a paricchie 'e chiste le venarra' 'a freva
pecche' chi vo' manna' Capua 'o campusanto
hadda pure sape' che " a li cunte siente 'o chianto "

Ma chello c'ha fatto i' 'o sicchio dint'o puzzo
e ha pruvucato critiche e despettuzze
so' state chille famuse " palette dissuasore "
ca 'na parte d''a Citta' avversa cu furore.

E' bbuono 'o principio 'e da' ordine e disciplina
'o traffico d''a Citta' che e' 'a principale arruina
e 'o vero respunsabiile e 'o vero assassino
'e 'stu cummercio nustrano ca , ormaie , sta' p''a fine.

Ma nun s'e' sentuto nisciun' accordammessere
'e defennere 'e cittadine ca vanno a piere
chille ca quanno vann' accatta' 'e negozie d''o Corso
o hanna fa' 'o slalom o hanna ì 'o Pronto Soccorso .!

E cchi ce va' pe' sotto si nun ce va' 'o cummercio ?
E' maje pussibile ca simmo tutte guercie?
Avimm'ammette ca p''o Centro storico e' vitale
una sola mmedecina : ll' isula pedonale !

Ce sta' chi dice ca 'sti paletti saranno na Caporetto !
Ma dicenno 'a verita' 'o teneno 'o defietto :
appena 'e guarde e le faje sulo na carezza
zompano pe' ll'aria che e' na vera bbellezza!

E quanno zompano rimane 'o turzo 'e fierro
e si ce 'nciampa vaie sicuro a faccia 'nterra ,
e pe'che sti carute, 'stu cumune in dissesto
hadda pava' mettenno ll'uoglio 'ncopp''o peretto!

Po' si guarde 'e vvie cu 'e turze allineate
annante all'uocchie pareno tutte vocche sdentate
e a' quanno ll'hannu miso chillo fierro a' fora
si nun te staje accuorto te mannan'o priatorio !

E pe' cchesto so' chiuvute critiche ferocie,
chell ' mare assaje e chelle acredoce ,
se so' furmate 'e cumitate proprio pe' ll 'uccasione
c'hanno dato forza e slancio all'upposizione .

Ma Capua critica pecche' se sente traduta,
pecche', se sente uffesa e se sente perduta
insomma ogni tanto, quanno le pare,
caccia ll'ogne a' fora e ..... so' cazze amare .!

Ce sta' chi e' d'accordo, chi prutesta e chi strilla
pro e contro a sti dissuasore "birilli",
ma ognuno a' fine, vo' 'e commete suoie
mentre a' dint''a stalla se ne fuieno 'e vuoie.

Po' ce sta' 'o mazzamauriello che armato 'e palillo
'a notte se svezea a vutta' nterra 'e birille.
E' nu fantasma pulitico ? O forze e' nu dispietto
e' chi pe' chisti birille ll'avut' a peretto.! ?

Insomma 'sti birille a na cosa so' servute,
a fa' risuscita' 'sta Citta' appecundruta
e ca ogne quarto 'e seculo se sceta na matina
e campa pe' cocche mese facenno 'ammuina !.

Pur''o Piano Regulatore se n'e' gghiut''o Creatore
e ha rimast''a ppere amice e accrastatore
e chi s'aspettava 'e 'n'ave' bbona furtuna
e' rimasto 'n'ata vota a panza riuna.!

Ce steva gia' aret''a sepe chi stev''aspetta'
'o mumento bbuono pe' ce ì a specula',
e si c'e' stato cocche prestanomme
s'appicciat''e scelle comm'a palomma.

Po' e' arrivata 'a sentenza d''o Cunziglio 'e Stato
ca 'o Piano Regolatore l'ha proprio archiviato ,
inzomma, a Capua,nun vva' cchiu' buono niente
stammo ienne chianu chianu 'nt''a cammera ardente.!

Pur''o gassifficatore e' rimasto fermo ''o palo
pure si ogne tanto ne parlan''e giurnale,
ma forze pur'isso e' gghiut' a ccarte quarantotto
e po' se vere appriesso 'o ruospo chi s'agliotte .

C'avimm'agliotte nuje ca stammo gia' accise
o 'o signore 'e Marcianise che ll'ha deciso ?
Nuie simmo sulo na nucella 'nt''o schiaccianoce
pecche' politicamente nun tenimmo cchiu' voce.

Insomma , nun ce resta che ammazzeca' amaro
avimmo pigliato 'n'ata vota ll' acqua c''o panaro,
avimmo perzo ato tiempo 'e 'sta povera vita sprecata
c'assumumiglia juorno pe' juorno a' na giostra scassata.

Ma tu mo' nun t'addulura' e nun te scunfira'
mo' e' Carnevale , e 'e tiempo 'e festeggia'
e si nun tiene renare pe' te magna' 'a lasagna
fa' pure tu 'e dibbete e mittel'a ccunto 'e papagne.

Po' fatte na brasciola 'e puorco niro casertano
e affugala 'nt''a nu fiasco 'e aglianeco nustrano
miettece pe' cuntorno ddoie pupaccelle forte
e po' mann'a ffa' nculo a cchi t'ha chius''e pporte.

Quanno po' haie fernuto 'e vevere e magna'
piglia 'a mugliereta e ghiesce a festeggia'
va' abballanno pe' 'e vvie 'e 'sta bella Citta'
e porta alleria e speranza a cchi' nun po' campa'!

Sul' accussi' po' turna' 'o Carnevale
chillo ca tu vuo' semprice e geniale
chillo ca vene 'a dint''a l'anema capuana
chillo ca te da' divertimento schietto e sano.

Mo' spero ca doppo 'sta sfucata nisciuno s'e' 'ncazzato
pecche' 'o pungolo d''a satira va' sempe respettato,
io ca d''o populo so' ll'anema soia stessa
dico che all'ammore p''a Citta' nun se fanno pruciesse.

Si po' coccheduno ce se vere e arraglia
Io le responno :che tiene 'a core 'e paglia !?
Ma nun sarra' accussì pecche' 'o fine d''e Cicuzze
e' chillo 'e fa' spurga' tutte chelle mmarruzze !!

Allora sperammo cu tutt''o core che 'sta Citta'
torna a' esse 'n'ata vota chella 'e tanto tiempo fa',
nuje ca simmo 'e figlie suoie stammele tutt' attuorno
pecche' torna 'n'ata vota Regina d''o Vulturno.

Mo' ve lasso ma v ' auguro do prufunno 'e chistu core
'n'anno 'e prusperita' , 'e salute , 'e gioia e d'ammore ,
che 'o Signore Unniputente ce pozza abbenedice,
e sperammo ca ghiammo meglio 'o duemila e sidice . !!!

VIVA CAPUA E CCHI 'A VO' BBENE !!!

Capua 5 febbaio 2015 - S.Agata – Patrona di Capua -
Detto antico : 'A bona parola ogne e 'a trista pogne .

Banner
Banner
 
Banner
Banner
Banner
Banner
Banner
Banner
Banner

Seguici su ...

facebook logogoogle+ logotwitter logoyoutube logo
Banner

Webcam Capua

Vista sul Lungo fiume Volturno

Vista Sud-Est

Newsletters










Articoli archiviati

Seguici su Facebook

Seguici su Twitter

Capuaonline.com utilizza i cookie per migliorare la vostra esperienza sul sito. I Cookie essenziali impiegati per il funzionamento del sito sono stati già impostati. Per saperne di più sui cookie che utilizziamo e come eliminarli, vedere la nostra policy sulla privacy .

Accetto i cookie da questo sito.