Carnevale di Capua: 'Le Cicuzze 2014' di Camillo Ferrara

Piazza dei Giudici - Cultura ed Eventi

cicuzze.jpgCICUZZE 2014

Benerice Capua nosta , o Signore ,
aiutala Tu , o sino’ se ne more,
e appriess ‘ a essa more pure na storia
ca ll ‘ha dato pe’ secule unore e gloria !

Nun me dicere niente , agge pacienza ,
ma sulo Tu ce puo’ tene’ accurtenza
a chesta Citta’ ca , pe’ mastefacenne ,
e’ stata cundannata senza fa’ niente!

Nunn’ ha peccato e nun t ‘ha jastemmato ,
t’ ha sulo adurato e glurificato
e quanno ha tenuto putere e putenza
t’ ha rengraziato e t’ ha jurato ubbedienza.

Che colpa ne tene ‘sta povera Citta’
si a’ anne e anne ‘a stann ‘ a’ ultraggia’ ?
Si ‘e figlie suoie stesse , vestute ‘a Pilato ,
ll’ hanno cundannata e ll’hanno ‘ncruciata ?

Si quanno stev’ ’a care’ e ha cercato aiuto
ognuno se n’ e’ futtuto e se n’e’ fujuto
lassannela sola , atterruta e spugliata
dint’’o scurore ‘e na mala nuttata. ?

E nisciuno papagno e nisciuna uscellenza
h ‘ avuto p’ essa pieta’ e cremenzia,
ma ll’ hanno fatta strascena’ fin’’ o calvario
a’ na morra ‘e tradetore e temmerarie .

E quanno, ‘ncruciata, durant’ ’a passione
era lazzariata ‘a na massa ‘e pappone
‘n’ esercito ‘e scippature ‘e mano- lesta
ll’ abbreviaie ‘a morte pe’ se spartere ‘e vveste !

Capua e’ spirata p’’e tutt’’e tribulazione
ca ll’ ha rato ‘a cunfrata ‘e ll’antico buttone
e parte ‘e ‘stu populo ca p’ave’ ‘a razione
s’ ha svennuto ‘a dignita’, acalann’ ’o cazone.

E cchi s’’accattato a prezzo stracciato
mo ’ e’ ‘mmiriato e respettato
ma cchi’ ll’ ha traduta pe’ na magnata
d’‘e figlie suoie stesso e’ stato schifato . !

Se chiurett’ ’e mmane dint’’a tagliola
e se facett’ abbarra’ ’a vocca d’ ’a mussarola
quanno fuie accattato e fatto priggiuniero
‘a chi o’ menaie ‘nt’’a miseria cchiu’ nera .

Pecchesto c’ haie penza’ Tu e nun te sfasteria’
si te cerco ‘sta grazia pe’ chesta Citta’,
accuoglie ‘sta preiera ‘e chistu mio core
che ‘a vede asservuta e chiena ‘e dulore.

E tu ‘o ssaie pecche’ te chiedo ‘sta grazia !
Pecche’ Capua mia s ’e’ redotta nu strazio !
Ha perzo ‘o sbrennore e tutt ’ ’a priezza
e campa jurnate ‘e miseria e tristezza.

Nu conta cchiu’ niente pe’ mmano ‘e putiente
‘a storia e ‘a dignita’ ‘e tutta ‘sta gente ,
pure Della Vigna , Fieramosca e Palasciano
se ll’ hanno jucate a sottamano. !

Mo’, chianu chianu , cu duvizia , te conto
chello ca e’ succieso , senza metterce ‘a ionta ,
e te dico a uno a uno , cu sincerita’ ,
’e fauze prufete ca ll’hannu fatta arruina’ !

Ma Tu fa’ attenzione e nun te distrarre
accussi’ puo’ capi’ chi ha rutt’’e ggiarre
e ll’ ha levato ll ‘ unore juorno pe’ juorno
mettennele ‘nfaccia ‘o russore d’’o scuorno.

E pe’ cundanna a cchi ll’ ha fatto ‘ o piattino
falle fa’ tre o quatt ’ anne ‘e pennecillina
e dalle tanta cauce ‘nculo e staccarate
ca s’ hadda penti’ ‘e quann e’ nnato.!

Ma io gia’ te dico ca e’ llonga assaie
‘a lista d’’e signure ca ll’ ha misa ‘nt’’e guaie ,
songo ‘e persunagge ‘e tutte ‘e bannere ,
so’ chill ‘ ‘e ogge ma pure chille d’aiere .

Ma ce sta’ pure na parte ‘e chesta Citta’
ca tene na colpa ca nun se po’ perduna’,
e’ chella ggente disurdinata e ‘ncivile
ca ‘a stann’ arreducenno comm’ a purcile !

Allora siente ! :

Venenne venenne aggi’ ’avuto ‘a ‘mmasciata
che a Capua ‘ a situazione s’ e’ ‘ncarbugliata
pe’ colpa d’’o Cumune , oramaie disastrato,
che s’ e’ ridotto ‘e piere ‘e pilato.

Sarra’ ‘n’ anema bona ca m’ ha mannata ,
p’’o desiderio ardente ‘e esse aiutata ,
a nomme ‘e tutte ll’uneste cittadine
ca so’ ‘nnammurate ‘e Capua Regina !

Era ‘ n’ urazione chiena ‘e dulore
ca cervava , pe’ ggrazia e cu tutt’ ’o core ,
‘e cuntrasta’ ll’ indifferenza e ll’ anarchia
che a Capua so’ ‘e peggie d’ ’e malatie .

E quanno se sposano c’ ‘a maldicenza
addeventano na bomba ‘e tala putenza
ca e’ capace ‘e distrugge , cu ‘nciucie e veleno,
‘a storia e ‘a dignita’ d’ ’a ggente perbene .

Ma io ca ce so’ nnato e c’ aggio campato
cunosco na malatia cchiu’ disgraziata ,
che provuca appicceche e chiavecaria
e c’ arruinato Capua : se chiamma ‘a ‘mmiria!

‘Sta malatia ca ce tene uno contro all’ ato
pecche’ vulimmo ‘nfama’ e nun esse ‘nfamate ,
ca ce fa’ cuntrasta’ a cchi lotta p’ ‘o bbene
e cumbattere ll’ommene uneste e serene.

Gudimmo a vere’ ‘e falli’ chi campa ‘e cummercio
e mmeriammo a cchi gode e tene ‘o supierchio,
chi sta’ all’ inferno ‘o facimmo pataterne
e a cchi sta’ ‘ncielo ‘o mannamm’ all’ inferno !

Facimmo cammena’ ‘ncopp’ ’e tappete
a chi ce ‘mbroglia e c’’o mett’ addereto,
alliccammo e servimmo chi vene ‘a luntano
e ustaculammo a cchi tene ’o sango capuano !

Fremmimmo p’’ o furastiero pe’ le fa’ ponti d’oro
chiunque sia , pure nu malfattore
e abbasta ca nunn ‘ e’ nnato ‘nt’’a cchesta Citta’
le dammo pure ‘o bastone pe’ ce fa’ struppia’ !

E quanno uno ‘e chieste parla a cap’ ’ e .. cazzo
p ’’o i’ a senti’ s’ arrevota ‘na chiazza
e si parla ‘e Capua e ‘a fa’ na mmunnezza
le sbattimmo pure ‘e mmane cu tutt’ ’a priezza !

LL’esempio chiu’ vero e ca se tocca cu mmano
e ca fa’ penza’ comm’ e’ fatt’ ’o capuano
so’ ‘e critiche ‘o Parco d’’e Fortificazione
‘e front’ a’ mezaluna , vicino ‘o Sperone.

So’ state spase , commo se prevedeva,
‘nciucie e calunnie a’ fa’ veni’ ‘a freva,
so’ asciute mmiezo ‘e sulone ‘e ll’Ambiente
ca primmo facevano ‘e statue durmiente.

Scandalo ! Scandalo , hann’ alluccato,
chi s’e’ permesso ‘e fa’ ‘stu riato ?
Chi ha ultraggiato ‘e vvecchie fussate ?
E chisto scempio chi ll ‘ ha urdinato ?

Ma fino a iere ce so’ maie passate
proprio affianco ‘e vecchie fussate ?
E nunn ll’ hanno visto , tutte ’sti espierte
ca ce steva na discarica a cielo apierto ?

Ce stevano ciesse, frigurifere , matarazze
e tanta mmunnezza a’ ienche na chiazza,
capannune abusive , cane c’’a rogna
e n’ esercito ’e zoccole, chell’ era ‘a vregogna!

E abbascio ‘e fussate ce so’ maie scise ?
E se so’ maie accorte ca ’e spogliampise
s’ hann’ arrubbato marme ‘e mattune
senza ca passasse p’’o cazzo a nisciuno !

Ma ‘o sanno ca Capua dopp’ ’a guerra
e’ stata sacchiggiata ‘a ‘n’ esercito ‘e sgherre
ca cu ‘a scusa e le da’ nu nuovo assietto
se ll’ hanna jucate nt’ ’a na man’ ’e zicchinetto ?


E allora pecche’ ‘stu “crucifigge, crucifigge “
e se sta’ facenno tutto chistu tracchiggio ?
Pecche’ sulo chesto ‘e fa’ allucca’ ‘o scannalo
quanno tutt’’a Citta’ sta’ mman’ ’e vandale ?

Pur’ ’o maciello ‘o chiammaieno giuello
e ‘o paragunaieno a nu bello castiello,
ma ‘a sciaurrataggena ll’avevano ‘nfracetato
primma ca gghieva mmano ‘e private.

Mo’ dopp’ arrubbato ‘e pporte ‘e fierro,
pruteste, denunzie e zerre-zerre
ma e’ troppo tarde pe’ pute’ prutesta’
pecche’ nisciuno tene deritto do ffa’!!

Mo’ nun vva ‘ bbuono pecche’ ‘e capuano
chillo ca ha c’ avuto ‘st’ idea ‘e vurcano ,
si era furastiero e s’ e’ venneva ‘e fussate
‘o fossero usannato e pure primiato !

E’ nu vizio antico ca nun ce sapimmo scutulia’
a copp’’a ‘sti spalle ca se stann’’a piega’
a fforza ‘e tene’ ‘st’ atteggiamento servile
cu chi ce scarpesa e ce fa’ passa’ p’ ’a trafila.

Nemo profeta in patria , dicevano ‘e latine,
e ‘stu ditto e’ de casa ‘nt’’a ‘st’ antica Regina
ca e’ stata pe’ secule na bella zuppiera
addo’ c ’azzoppan’ ’o ppane primm’ ’e furastiere.

Ma attenzione a nu fa’ ‘e ll’ evera unu fascio ,
‘e chille bbuone e chi c’ha purtat’ ’o scatascio,
chille ca cu furbizia , c’ ’o ricatto e ll’accatto
so’ trasute ‘e sicco e se so’ mmiso ‘e chiatto.!

Pecche’ ogne regula tene ll’eccezione
comm’ all’ assessore Iolanda Capriglione
ca ‘a quanno ha pigliato mman’ ‘a Cultura
a sta’ facenn’’ arriva’ gia’ ‘ndirittura !

Fatica cu nu ‘ndusiasmo e na passione
ca, ogge, nun tene nisciuna guagliona,
e’ prufessionista ‘e parola e assaie cumpetente,
percio’ ‘a sceveta d’’o Sinneco e’ stata eccellente.

Ma ce sta’ chi ‘sta sceveta a’ va’ murmulianno
p’’o desiderio ‘e accuntenta’ ‘e mezacanna
ca, sotto sotto, vanno truvanno , tramanno,
‘e ss’assetta’ , lloro , ‘ncopp’’a chillu scanno.

‘ A lengua nun tene uosso e rompe ll’uosse
commo dice na capera ‘e fede rossa,
una capace ‘e tesse cierti tele
ca fanno piglia’ a mazzate pure ll’angele ‘ncielo !

Nun se ne po’ cchiu’ e nun se po’ cchiu’ campa’
pe’ troppe vipere ca stann’ avvelena’
chesta Citta’ addo’ centenare ‘e basiste
fanno ll’ interesse ‘e altrettante affariste!

M’ avvertito Franco Fierro , principe d’’a capuanita’,
ca nu vo’ vede’ ‘e muri’ chesta bella Citta’
ca ogge e’ addeventata ombra ‘e essa stessa
‘a quanno nun tene cchiu’ voglia e interesse.

A’ quanno ha perzo ‘e titule ‘e signora e rigina
pe’ colpa ‘e na pulitica vennuta e assassina
ca ll’ ha fatto perde nommena e prestigio
riducennela ’a lemmosena ‘ncopp’ a sant’ Eligio .

Denunziava ca ‘a Citta’ e’ avvuluta e cunfusa
pe’ ccolpa ‘e n ’amministrazione assaie letecusa
ca se sta’ vuttanno ‘ncuollo mmerda e veleno
ca ‘a fanno traballa’ e mantene’ a malapena .

Songo lotte e curtellate ogne mumento
e minacce pesante , ditte ‘a fora d’’e riente ,
tra chille ca stann ‘ assettate ‘a pultrona
e chille ca vulessero fa’ nu poco perona .

Ognuno surogne e mogne ‘e pecore soie
ma a nnuie c ‘ hannu miso nt’ ’a salamoia ,
e lla’ restarrammo , senza fa’ nu lamiento
rumpennece a sango , commo fann ‘’e fuiente.

Tutte ll’attese e tutt ’ ’e giuramente
so’ sparute , accussi’, ‘mpruvisamente ,
e maie cchiu’ se ponno cuncretizza’ :
pecche’ latte ‘nt’ ’e zizze cchiu’ nun ce ne sta’ !

E a nnuie nun ce rimane ca canta ’ ‘e diasille ,
a tutte ‘e sanguette vestute ‘angiulille
e a chisto Cumune , asseccato ‘a denare ,
ca nun tene ‘n’euro manco se ‘o sparano!

E io ce so’ rimasto assaie ‘mpressiunato
a senti’ tutto chello che m’ ha cuntato ,
me s’e’ arrevutat’ ‘o sango , me so’ avvelenato
e me so’ ‘nguaiata chesta bbella jurnata!

Vurria tene’ ‘a forza ‘e na belva feroce
pe’ scamazza’ ‘nt’’e mmane , comm ‘ ‘a na noce ,
ma po’ bbene ca voglio a ‘sta bbrava ggente
aggi’ ‘a fa’ finta ‘e nu sape’ niente .

Ma , io dico , e’ mmaie possibile ca ‘sta Citta’
nunn’ e’ stata maie cazza ‘e s ‘ arrebbella’ ?
Allucca , spergiura e mostra ‘a scuppetta
ma nun tene ‘o curaggio ‘e spara’ iusto ‘mpietto !

E’ mmaie possibile ca se fa’ marturizza’
e nun tene ‘a forza nemmeno ‘e sciata’
e de sape’ rennere dente pe’ dente
a cchi ll ’ha scassato ‘e guarnemiente !

E so’ anne e anne ca ‘ncopp’ ’o Palazzo
se magna, se veve e se fanno ’e ‘ntrallazze
e ce sta’ ‘o suspetto ca dint’ ’o pastone
c ‘ hannu magnato ‘e puorce ‘e tutt’’e nazione!

C ’ hannu magnato e c ’ hannu pure sguazzato
‘a faccia ‘e chi ll’ ha sustenute e ll ’ ha vutate
strafuttennese d’’e besuogne d’’a povera ggente
e arapennele na ferita assaie puzzulente .

Po’ quanno ‘a ferita e’ gghiuta ‘ncancrena
nisciuna terapia ll ’ ha fatto cchiu’ bbene
e ‘stu populo , ca teneva putenza e vigore ,
ha fatto ‘a fine d’ ’e cavalle ‘e monsignore.

E fa’ nu diebbeto ogge e dimane ‘n’ato
‘o bubbone ’e pus s’ e’ ‘a fine schiattato
e ce so’ ‘asciute diebbete a bastemiento
ca mo’ s ‘ hanna pava’ c’’o sango d’’a ggente.

E ll’ ha fatto schiatta’ chi ll’ ammenestrato
da cinquant’ anne fin ’ a ‘st’ annata,
chille ca se so’ alternate e zucanno zucanno
s’ hanno futtuta tutt’ ‘a bevanna !

Percio’ ogge nisciuno po’ spara’ sentenze
si primmo nun se guarda dint’’a cuscienza,
e a cchi ‘nt’’a recchia ce vo’ mette ‘stu tarlo
dicimmele ‘n faccia : siente chi parla !

Ievan’ allere li bandite e deritte ‘e scuppettate
quanno a tavula pe’ marenna ce stev’ ’a marmellata
po’ quann’ ‘o patrone ‘nserraie ‘a maschiatura
fernette ‘a marmellata e pur’ abbeveraturo.!

E mmo’ ca o’ malato e’ mmuorto se vonno giustifica’
ma arreto nun se torna e nun s’ hadda turna’,
ormaie ‘o ceceno e’ rutto e nun se po’ accuncia’
percio’ ‘e paparelle nun se ponno cchiu’ svizia’ !

Pur’ ‘o cane c’ abbaia e tene sempe ‘a lopa
si nun se st’accuorto se fa’ ‘a bbarba c’’a scopa,
e si se scass’’o varrillo e ghiesce fora ‘o ‘nghippo
stavota pur’isso s ‘ ‘a fa’ cu ll’ ova ‘a trippa .!

Ma ‘a quanno so’ fernute ‘e iuoche e ‘a bbiava
stanno tutte quante c’’a vocca chin’’e bbava
speranno ca ll’ arriva ‘ n’ato colpo ‘e culo
pe’ fa’ assapura’ , semp’ ’o populo , ‘o stesso cetrulo !

Pe’ ‘sta paura ‘a ggente , senza cchiu’ riverenzia,
sta’ a piglia’ chiano chiano chello poco ‘e cuscienza
ca pe’ troppo tiempo s’ ha tenuto addurmuta ,
arrialannese nu dimane ca sta’ tutto ‘nsagliuta.

Percio’ chillo ca ogge ce stann’ amministra’
hanna fa’ pur’ ‘e cunte cu ‘sta nova rialta’
sino’ farrann’ a fine d’ ’o piro ammaturo
ca care , sulo sulo , senza turceturo . !

In altre parole , commo dice ‘a ‘ntachepera
pe’ capre ‘e pe’ piecure e’ fernuta ll’ evera ,
c’e’ rimasto sulamente nu campo ‘e fetuse
pe’ pecure zoppe ca magnano annascuso !.

Mo’ ognuno va fuienno e se fa’ ’e lagnanze
p ‘ annasconnere ‘o grasso ca tene ‘ncopp’’a panza
ca s ‘ha bbona ’ngrassata ‘nto tiempo d’’a magnanza ,
quanno ce spenzavano ‘e buscie e ‘e speranze!

Quanno ce facevano sunna’ a’ uocchie apierte
mentre se spartevano ‘e carrecupierte
e mentre ce prummettevano nu dimane sicuro
c’ arreducevano pezziente e scauze e annure !

Mentre ce prummettevano ‘e ce da’ nu nuovo sole
c ‘ ava fa’ asci’ Capua a’ dint’ ’o scurore
ce ‘nserravano , a trademento, int’’a na caiola
stipate , commo stanno ‘e valline uvaiole !

Pecche’ ‘o populo pe’ lloro e’ na vallina uvaiola
nata e crisciuta pe’ caca’ sulo ll’ ove
ca lloro se veveno e ce se fann ‘ ’e ffrittate
mentre a’ Citta’ se ne va’ ‘o gloriapate.

Ma si ‘o populo facesse ‘a prova d’‘o mellone ,
nunn ‘a sentesse cchiu’ chella stessa canzone
ca ce cantano ‘sti musicante dint’’e serenate
ca ce purtano tutt’’e sere quanno vonn ‘ esse avutate !

Mo’ stanno danno ’a colpa sulo ‘o capocurdata ,
chillo ca e’ ‘o meglio ‘e tutta ‘sta cunfrata
ma pecche’ sta’ assettato ‘ncopp’ ’a primma pultrona
hadda pava’ isso pe’ ll’ armata brancaleone.!

Dice uno “ io c ’ ‘o dicevo a chillu cucciuto
ca chistu Cumune era bello e falluto,
ma mentre c’’o dicevo isso se rattava
e guardava si ll’ auciello se beccav’ ‘e ffave !

Pecche’ isso zappava, semmenava e surava
pe’ cultiva’ p’ ’a Citta’ ettar’ ‘e fave,
ma commo sgugliavano ‘e primme cimmetelle
s’ ’e beccavano , ‘e pressa, sempe ‘e stesse aucielle .

Chill’ ato persunaggio c’ ’a faccia sengata
tene ‘a mugliera delusa e amariggiata
pecche’ a’ quanno ‘o Cumune e’ gghiuto ‘ndeclino
nun sta’ a purta’ casa manco nu quattrino .

Dice ca ogne tanto arrevot’ ’e culunnette
pe’ vede’ si s’ annasconn’’o sango int’ ’e fialette,
‘o sango d’’o populo ca e’ assaie assaie doce
specie si se zuca senza purta’ a’ croce!

Ma mentre se cumbatteva pe’ nu ffa’ affunn’ ’a nava
‘a rogna d’’o dissesto pigliava gsempe cchiu’ spavo
finche’ arrivaie , fatale, ’o mumento cruciale
chillo ca ce sta’ facenno caca’ ‘nt’’o ditale.

E chisto e’ ‘o mumento cchiu’ tragico e amaro
pecche’ e’ nu dissesto arcimiliunario
ma ‘o Sinneco ca sape a isso e nunn’ e’ percuoco
dice ca pure stavota se ne iesce a’ int’’o ffuoco .

“ Io nunn’aggio fatto niente , dice nu ‘ndiziato
so’ stato furtunato e mm’agg’’a truvato na casa
e mm’ aggi’’a truvata senza fa’ ‘e capriole
commo facette ‘o menisto Scaiola !

E siccome ‘o giudece ha ditto ca nunn e’ riato
si uno se trova na casa arrialata
mo’ me metto all’ opera e ‘a bbuono vurpino,
ma faccio arriala’ .... na bella palazzina !

‘N’ ato , acceppucuto comm’ a ccane secutato
ha ditto ddoie parole , ma nun s’e’ sbilanciato,
ma se puteva vede’ comm’ a asso ‘e denare
ca sapeva commo e pecche’ s’e’ sfunnat’ ‘a caurara !

E mmo’ ca ll’ urchesta nun sona cchiu’ ’a ffesta
nisciuno ne vo’ sape’ ‘e chistu ddio ‘e dissesto
ma sunarra’ a mmuorte e tra nu miserere e n’ alleluia
chillo cetrulo ‘o pigliaramm’ ancora nuie . !

Dice Iannotta, ca e’ ‘o nimico capitale
‘e chest ’ Amministrazione senza cchiu’ petturale
che tutt’ ‘a verita’ ‘a sape ‘o masto ‘e festa
e chillo ca sotto sotto sta’ a derigere ll’ urchesta .

Dice ca isso e’ ll’ uneco che ha cuntrastato
tutte chisti signure ca c ‘ hannu arruinato
e giura e spirgiura ca truvarra’ arricietto
sulo quann’ ‘e vere c’’a capa dint’’a cascetta.

Se ll’ ha pigliato pure c’ ‘a Presidente Ragozzino
ca dint’ ’a Frazione fa’ ‘a dommene – austino,
ll’ ha ritto ca S. Angelo ha perzo tutt’’o murdente
a’ quanno s’ e’ accanuta a ffa’ ‘a Presidente .

‘Mmece ‘e ji’ annante sta’ ienne sulo arrete,
e chesto ‘o sape, bbuono, pure don Franco , ’o prevete,
percio’ e’ arrivata ll’ora ca s’ hadda da’ na mossa
si no dint’’o paese succere ‘na summossa!

A Ricci ll’ha cuntestato ‘nt’’o stesso manifesto
ca e’ isso ‘o direttore ‘e tutta chest’ urchestra
che ‘a quanno nu sona cchiu’ cu arte e cu priezza
rischia ‘e ferni’ , pur’essa, ‘nt’’e bballe d’’a ‘mmunnezza !

‘E stesse cose ‘e cuntesta ‘o cunzigliere Minoia
ca dice ca uno piu’ uno, a’ casa soia, fa’ ddoie,
percio’ fa’ ‘o Savonarola pe’ subbilla’ a ggente
ma parla, parla, parla ca… ‘o cazzo te sente!

Teneva na rucchietella proprio ‘e front’ ’o Cumune
e ce scacateava mustranno riente ’e punie
ma quanno parlava ‘e ‘nciarme o ‘e quacche ‘nguacchio
‘ a rucchietella, disturbata, ‘o pigliav ‘a pernacchie .

Allora ha cagnato ’a rucchietella cu nu pappavallo
ma se n’e’ accorto ca Coco’ e’ pure cacaglio
pecche’ quann’ isso sbraita contr’ ’a tutt’ ’o Palazzo
‘o pappavallo le dice “ ma..ma..nnn nun ce rompe ’o cazzo !

Isso giura ca ‘o dissesto vale quinnece miliune
e ca ce farra’ vennere ’e mutande e pur’ ‘e cazune
ma fa’ ‘ncazza’ ’o sinneco ca peggio ‘e nu mastino
le risponne “ ‘a saie pure tu ‘a morte ‘e Giacchino “ !

Ma Minoia , a ogne costo , vo’ scupirchia’ ‘a tiana
pe’ da’ suddisfazione a Paolo Romano
ca mo’ ha pigliato ‘a via d’’o Nuovo Centro Destra
c’’a speranza ‘e fa’ ‘o sulista ‘nt’’a nova urchestra.

E mentre gia’ se sentono ‘e arriva’ ’e trubbee
‘o Presidente Romano gia’ penza all’ europee
accussi’ saluta pure a Stefano Caldoro
ca ha pigliato ‘o terno e le fa’ ponti d’oro.

Buglione e Caputo se so’ nu poco defilate
‘a quanno ll’acque se so’ assaie ‘mbrugliate
e siccome ‘o sinneco ‘o vonno crucefisso
stanno facenn’’o tutto p’’o fa ii’ ‘nsubbisso .

Aspettammo ‘o nimico sott’’a chistu ponte
addo’ vo’ o nu vo’ hadda veni’ a fa’ ‘e cunte,
Casini , figliuol prodigo, e’ turnato addo’ ‘o patrone,
percio’ ,si ce vo’,Antropoli , hadda pusa’ ‘a pultrona !

‘Mmece Pascale Frattasi e Tonino Gucchierato
hannu deciso ,amorcunzente, ‘e fa’ ‘a stessa strata
e sfidano e cumbattono ‘mbruoglie e tozzabancone
p’ accuntenta’ tutt’ ’e scuntente ‘e ‘st ’ Amministrazione.

Pure quanno se bucaie ‘o funno d’’a caurara
prevedettero c’ arrivava ‘na tempesta ‘e mare
ma quann’’o temmuniere nu vulette cagna’ rotta
pigliaieno ‘o llargo primmo ca faceva notte!

Se cumpurtano ‘a cunzigliere serie e respunsabile
a’ quann’ ’o dissesto era ancora abburdabile
ma, ancora ogge, nisciuno ‘e vo’ sta’ a senti’
pecche’ ‘o peggio surdo ‘e cchi nu vo’ senti’.

E cuntinueranno ancora a suna’ ‘a campanella
finche’ nun se capota tutt’ ‘a bancarella
ca, secondo loro e’ gia’ bbella e falluta
pecche’ ‘nt’’a matra nun ce sta’ pastacrisciuta.!

Ogni tanto va’ ‘ntrincea pur’ ‘a cunzigliere De Balzo
ca piglia ‘o fucile e appripara e aiza ll’ alzo
ma quann’ ha pigliato ‘a mmira e sta’ pe’ spara’
se ferma e penza : ma chi m ’ ’o fa’ fa’ !

Me cunviene ‘e sta’ quieta e me juca’ ‘e ccarte
sulo quanno Paolo Romano , eletto , se ne parte ,
po’ na vota ca e’ gghiuto a guverna’ a Strasburgo
veco comm’ aggi’ ‘ fa’ pe’ sciogliere ‘stu nurgo.

Chille d’’a maggiuranza so’ addeventate audace
pecche’ tutt’ ’e juorne menano ‘e cauce
capitanate d’’o cunzigliere Tonino Valletta
ca vo’ vere’ tutto chello ca sta’ ‘nt’’a scazzetta!

E appriesso a isso tutte quante ‘e sudale
mannanno tutt’’e juorne nu brutto signale ,
cantano ‘ncoro “aggiungi un posto a tavola”
ma se vonn’ assetta’ subbeto e nunn’aspetta’ a Natale!

“E io pago” dicette ‘o Sinneco, int’’a ‘n ‘ ammuina ,
chiste so’ overo na massa ‘e mappine,
vonno ca ‘nfronte m ‘ aggi’’a mette ’e scolle,
ma me fossero pigliate pe’ na fogliamolla !

E tocca sempe a mme ‘e fa’ ‘e salte murtale
pe ‘ tene’ allerta ‘sta bbanda ‘e generale ,
specie a chillo signore ca nu maie accumpare
ma ca sta’ sempe mmiezo a tutte ll’affare !

E nun parlammo ‘e chill’ ato ca sotto sotto
se vo’ magna’ tutt’’e juorno pizze e panzarotte
ca se vulesse frie cu ll’uoglio d’’o Cumune
pecche’ nun ll ‘ e’ maie piaciuto ‘e rimane’ diuno!

E chill ‘ ato ca , tutt’’e iuorne , sta’ semp’ allancuto
e pare ca tene ll’ anema sempe acceppucuta,
tene na sete e na famma accussi’ arretrata
ca se vevesse ‘o Vulturno cu tutt’ ’a Limata!

Chill’ ato ‘e for’ ’e pporte chiagne e ss’ allamenta
pecche’ ‘a cocche tiempo nun piglia ll’alimente,
s’e’ fatto sicco sicco comm’a na lacerta
aspettanno ‘e se ‘ngrassa cu cocca bbona ufferta.

Ma io cocche juorno me mett’’e pann’’e Schettino
e c’’o faccio fa’ io ,a cchiste, nu bell’ inchino ,
si overo me sfasterio , senza misericordia ,
‘e capoto ‘ncopp’ ’e scoglie comm’’a Costa Concordia!

Accussi’ vedimmo, nu poco, ca so’ bbuone a ffa’
senza chistu fesso ca se sta’ a sderena’,
vedimmo si ‘sti ciucce ca nu cunoscen’ ’o tiro
so’ capace , tutte ‘nsieme , ‘e accucchia’ na lira .

Ma io veco ‘o dimane ca e’ niro e ‘nsicuro
e ca quase quase m ‘ abbia a fa’ paura ,
gia’ vicino ‘o Cumune, ‘a Corte d’’a Bagliva
diceno ca ll’Amminitrazione e’ cchiu’ mmorta che viva !

E ‘o diceno persunagge ‘e tutto rispetto,
gente ca nunn ‘ e’ abituata a fa’ ‘o scendiletto,
ca tene ‘ncapo cu tutt’ ‘a serieta’
‘e mena’ ‘o salvagente a ‘sta bella Citta’. “

Chesta e’ ll’aria ca tira’ ncopp’ o Cumune
e che nun po’ fa’ bbene proprio a nisciuno
pecche’ se sape ca quanno nun c’ e’ sta’ pace
nisciuno dorme quieto dint’’o liett’ ’e vammace .

Ma si nuie , overamente, ce vulimmo salva’
na strada sulamente ce tocca ‘e piglia’,
c ‘avimma cunvincere ca chesta Citta’
sulo ll’arte e ‘a cultura ‘a ponno salva’.

Tenimmo monumente ca nun teneno prezzo
che c’ ha lassato chi ce teneva penziero e accurtezza ,
chelle ricchezze ca , ‘a quanno sta’ sottoencoppa ,
chi nunn’ ’e vo’ bbene ce sta’ a piscia’ ‘ncoppo!

Addonca s’ avota e addonca se gira
chi ‘a vene a visita’ , ll’ammira e suspira,
dice “ chesta Citta’ e’ nu vero gioiello
ma e’ comm’a n’ auciello ca nun tene ‘e scelle !

A cchi aspetta a mustra’ tutt’ ’e ricchezze
e a farse apprezza’ tutta quanta ‘a bbellezza
ca tene astipata e ca s’e’ ‘nfracetata
a fforza ‘e sta’ chiusa e abbannunata ?

Dint’’a Cappella d’’o Santissimo Sacramento
ce stevano chiuse sette statue d’argiento
ca cercavano , pe’ misericordia , ‘e asci’ ‘nprucessione
pe’ piglia’ nu poco d’aria , pure nu vuccone !

E stevano ‘nprigiunate , senza misfatto ,
e nisciuno sapeva cchiu’ comm’ erano fatte,
nisciuno se ne futteva e faceva finta ‘e niente :
mo’ doppo ‘ sittantanne succede ‘o grand’ evento. !

Pe’ grazia ‘e Nostro Signore , ‘o papa Francisco
‘ncopp’ ’a ll’antica cattedra d’o martire Prisco
c ‘ ha mannato ll’arcivescovo Salvatore Visco
ca a’ Chiesa ‘e Capua ll’ ha purtato refrisco .

Doppo ll’entrata triunfale, ha pigliato pussesso
e s’ e’ avutato ‘o vangelo , ampressa ampressa,
pecche’ doppo cchiu’ ‘e trentanne ‘e acqua stagnante
s’e’ fatto chello ca vuleva ’o Spiritussanto.

‘E sentenelle ll’ ha cagnate subbeto ‘e pustazione
accummencianno ‘a chella ca steva ‘nt’’o Duomo
addo’ don Gianni Branco, prevete geniale
e’ gghiuto a derige ‘a Cumunita’ Parrucchiale.

E pe’ dda’ subbeto nu segnale ‘e discontinuita’
s’e’ mmiso ‘a fatica’ e s’ e’ fatto apprezza’
c’’a Messa sulenne pe’ S. Agata patrona
arrialann’ a’ Cattedrale na nova stagione.

Ma ‘o rialo cchiu’ bbello ca le da’ ‘e cumpiacimente
e’ che sta’ ‘appripara’ ‘a prucessione ‘e ll’Argiente
e a Ddio vulenne ne darra’ ‘o primmo saggio
‘a primma o a’ siconda dummeneca ‘e maggio.

E chesta sarra’ ‘a riscossa ‘e ‘sta cchiesa millenaria
ca ‘e stata pe’ trentanne ‘nt’’o reliquario
e ca, ogge, finalmente e’ passat ‘ all’ attacco
alluntananne , accussi’, nu grave smacco .

Pure ‘o Museo diocesano respira aria capuana !
Pur’ isso steva chiuso aspettanno dimane,
chillu dimane ca nun maie arrivava,
e ‘nfracetav’ ’e bbellezze ca Capua ‘gnurava .

Allora grazie e augurie all’ Arvivescovo Visco
che ha cagnat’’a musica ‘ncopp’’o giradischie,
augurie a tutt’’e sacerdote ‘e ‘sta gluriosa Chiesa
ma don Gianni doppie aurie ‘e na grande impresa.

Doppo ’a benerizione ‘e Giorgio Napolitano
gia’ st’ arrancanno ‘o Museo Campano
doppo ‘a scopa nova nun c ‘ e’ stato rilancio
pecche’ ‘a Pruvincia nu ll’ha rato nu gancio !

Si nun trase ,ampresso , int’ ‘e percorse turistice
ha voglia ‘e se mette ‘mmostra o ‘ncurnice,
‘a salvezza e’ Caserta c’hadda mulla’ ‘o piezzo
sino’ p’ ‘o Museo Campano nun ce sta’ salvezza.

Ma pure ‘e capuane , e chesto e’ assaie grave ,
a ‘stu Museo nun c’ hannu dato maie spavo ,
na bbona parte nu sape manco ca ce sta’
‘nt’’a ‘stu cuntenitore ‘e storia e d’ antichita’.

Chello ca ce manca a chesta nosta Citta’
e’ ‘a cosa cchiu’ ‘mpurtante : ‘a vivibilita’
e si ‘e ccose nun vanno abbastanza perbene
‘a colpa e’ sulamente ‘e chi n’ ‘ a vo’ bbene !

‘E vvie d’’a Citta’ , chelle cchiu’ squnquassate,
so’ state quase tutte quante accunciate
ma p’‘a passeggiata ‘ncopp’a Riviera
ce vo’ na reflessione abbastanza seria.

Se nun se pigliano severe remmedie
si ripetarra’ sempe ‘a stessa cummedia,
s’ hann ‘ adutta’ ‘e llegge e tutt’’e strumiente
pe’ nu fa’ passia’ ‘a ggente int’’all’ escremente.

Chi tene ‘nu cane e ‘o vo’ overo bbene
‘o purtasse a passia’ addo’ isso retiene
ma se purtasse ,appriesso , na bbella paletta
si vo’ bbene ‘a Citta’ e ce tene rispetto !

‘A Riviera e’ proprieta’ ‘e tutt’’e cittadine
nu sulo ‘e chi ce porta ‘o cane ‘a matina
e nunn’ e’ certamente ‘o cesso d’’e cane
commo ll’ ha fatt’ addeventa’ cocche trappano.

‘A villa cumunale s’hannu futtut’’e cancelle
forse p’ opera ‘e quacche mazzamauriello,
‘o juorno ‘o Sinneco ll’addobba e ll’ acconcia
e ‘a notte ‘o munaciello va’ ‘e ll’ha sconceca.

‘Sta Citta’ chi ll’ uffende , chi ‘a desprezza
chi ll ‘ uffende e ‘a fa’ na mmunnezza,
chi ll’ultraggia e chi ‘a scassa e ‘a sporca
penzann’ ‘e campa’ ‘nt’’o puntillo d’’e puorche .

E chi ’a vo’ bbene rimane scumbinato
a vede’ ‘sta Citta’ accussi’ arruinata
che ha perz ‘ ogne ordine morale e civile
a’ quann’ e’ na pecura senza cchiu’ uvile .

Pur’ ’o cummercio ca fin’ all’ uttanta
era pe’ Capua ‘o sustegno e ‘o vanto
s’e’ stutato chianu chianu comm’ a cannela
ca sott’ ’o lucigno nun tene cchiu’ cera.

Diceno Paolo Esposito e Gennarino Cardenuto
ca ‘o cummercio a Capua e’ proprio fernuto
e ca ce vo’ sulo ‘o manifesto funerario
pe’ ll’ annunzia’ ‘a morte doppo lungo calvario.

Dicevano ca ‘o traffico salvava ‘o commercio
e che le faceva ‘ncassa’ pur’ ‘o supierchio
ma era na diagnose assaie azzardata
pe’ na Citta’ ca n’ ha passat’ ’a nuttata!

‘E traffico se campa ma se pure more
e chello ca se vede a Capua rimane ‘nt’’a storia,
‘e cchiu’ bbelle vvie so’ tutte uccupate
‘a centenare ‘e machine in sosta vietata.

Ma commo vulite ca se va’ ‘accatta’
si a ppiere nun se po’ cchiu’ cammena’,
quann’ iesce a piere ll’haie ave’ bbona
si te riesce a repara’ sott’a nu purtone.

A Natale c’e’ stata ‘a prova d’ ’a verita’
e se so’ viste ‘e limite e ‘a capacita’
‘e nu cummercio ca , perdut’ ’a sciorta,
durmeva beato ‘nt’ ’e bbraccia d’ ‘a morte !

Nun se vedeva p’’e vvie ‘n’ anema viva
ca puteva fa’ almeno da palliativo ,
se rispirav’ ’a desperazione, tirav ‘ ‘a tramuntana
e dint’’e puteche nun ce steva nu cane !

Ll’ albero ‘e Natale stev’ allummato
mmiezo ‘a na chiazza mez’ addubbata
addo’ , ogne tanto , ‘a musica d’ ‘e ciaramelle
scetav’ ‘e patrune ‘e ddoie bancarelle.

Era nu spettaculo ca faceva azzelleni’
pecche’ manc’ ’o cimitero ‘e triste accussi’
ma tanto triste ca a Natale a matino
se ne fuiette pur’ ‘o Bammino !

Ma pecche’ ‘o Cummercio e’ rimast’ ’a fenesta ?
E’ pecche’ avimmo perz’’a via maesta !
Capua e’ na Citta’ ca nu tene cchiu’ niente
pe’ colpa ‘e na pulitica ca nunn ’ e’ gghiuta niente!

Ma io dico chi critica addo’ steva a campa’
quanno ‘sta Capua ’a stevano arrubba?
Forse quaccuno ha parlato o ha prutestato
quanno ‘a pretura ce ll’hanno levata?

E forse quaccuno ha fatto quacche farzata
quanno ll’Imposte Dirette ce ll’hanno scippata?
E ‘o Catasto se ne gghiuto sulo o e’ sparuto?
E pure chillo ce ll’hanno futtuto!

‘O distretto Militare fuie pe’ sbaglio abbulito
o cocche pulitico se ll’ha trasferito?
E ‘a Caserma Fieramosca cu cchiu’ ‘e mille surdate
me sapisseve dice commo se ll’hanno pigliata?

Chella fuie na rapina a man’ armata
che primma da fa’ fuie bbona sturiata,
pozza sta’ cu ll’angele ‘nt’’ a’ gloria ‘e DDIO
chi ‘a facette ll‘agg’’a cunusciuto pur’ io :

Dicette ‘stu menisto ca pe’ cocche juorne
‘e surdate avevano fa’ nu ponte ‘ncopp’’o Vulturno
e sarriano turnate ,priesto, a copp’’o Matese,
ma se vede ca turnanno sbagliareno paese !

E ‘o Palasciano ch’ era ‘o meglio spitale
e’ overo ca c’’o levarono pe’ nu scagno ‘e riale
ca se facettero ‘ntiempo d’’e regionale
dduie persunagge pe’ fa’ ‘o speziale?

E tutt’’e renare ca ce so’ state spennute
so’ servute pe’ vutta’ e carre ‘ncopp’ ’a sagliuta ?
O so’ state spise , commo dice ‘a ‘nciucessa
sapenno pure bbuono ca veneva suppresso ?

Pero’ na cosa sola e’ certa e sicura :
‘a sanita’ a Capua sta’ scauza e annura !
E vv’ allicurdate ll’Ufficio ‘e ll’ENEL ?
pure chllo iette ‘nt’’o maceniello !

E ‘o Ricciardi , ll’antico tiatro
nunn’ e’ gghiuto pur’ isso ‘o gloriapatre ?
‘Nt’’a na Citta’ ca tene migliare ‘e surdate
nu ce sta’ cchiu’ ne’ cinema e ne’ tiatro !

Mo’ se ne va’ ll’ Ufficio d’o giudece ‘e pace
accussi ce mettimmo ll’ anema ‘npace
facimmo trasi’ ‘o Vulturno dint’’e fussate
e mettimm’ ’o cartiello “ vietata ll’entrata “ !

Insomma Capua ch’era Rigina d’’e faste,
ogge ‘e quatro da mettere all’ asta!
Nu tene cchiu’ niente , e’ stata spugliata
comm’ Addulurata, ‘a fora peccato !

Morta ! E’ mmorta Capua nosta bbella ,
nun tene cchiu’ nniente , e’ mmorta puverella
e ll’avimm ‘ accisa nuie , nuie , tutte quante
e nun ll’avimma affussata manco ‘nt’’o campusanto.

‘E defenzore d’’a patria tuttora vivente
facettero pure lloro comm’ ‘e fuiente ?
O a chillo tiempo nu tenevan’’e cchiocche
o durmevano tutte quante c’’a zizza mmocca ?

Ma ‘stu Sinneco tuosto nun se vo’ arrenne
e prugamma ’e ccose oltre ‘e calenne,
vo’ fa’ chello che ’o pappece dicette ‘a noce :
damme ‘o tiempo ca te spurtoso .

Aspetta sicuro tiempe cchiu’ serene
pe’ se fa’ turna’ ancora a vule’ bbene
doppo na stagione sfurtunata e funesta
ca ‘a chiuso ‘o 2013 c’ ‘o famuso dissesto .

Ma tutto sta’ mmano ‘e tre cummissare
c ‘hanna verifica’ chi ha sfunnato ‘a caurara,
po’ commo e quanno se sarra’ cchiu’ alla’
e sulo tanno se putarra’ judeca’!

Percio’ io Re Carnevale ‘nt’’a ‘sta baraonna
pe’ ‘stu Sinneco so’ addeventato ll’urtema sponna
pecche’ si ‘o populo se deverte so ’ fa’ a sangiuvanne
e campa quieto pe’ chist’ ate dduie anne.

Percio’ m’ aspetta na fatica pesante
fatta ‘e curiandule e de stelle filante
pecche’ e’ tropp ‘ ‘a voglia ‘e rire e pazzia’
‘e ‘sta ggente cundannata senza pieta’ !

Me cunviene ‘e sparagna’ ‘stu ppoco ‘e sciato
pe’ quanno lle canto ‘sti diasille pepate
a stu cumune ca cu ‘e dibbete a ‘nzerta
ha fatt’’a fine d’’o piattaro ‘e Caserta !

Percio’ fermammece ‘a primma lucanna
e appilammo subbeto ’a vocc’ ’a famma
pecche’ ‘st’ anno si nun c’ aiuta ‘a furtuna,
restammo sicuramente ‘a panza riuna !

E nunn’ e’ ‘a primma vota , si succedesse ,
ca a ‘stu Rre Carnevale ‘o vonno fa’ fesso ,
ogn’ anno iesce mmiezo nu nuvello salvatore
ma ‘o ffa’ sulamente pe’ ‘nfuca’ ‘o papore !

Ma chillo ‘e nu papore ca nun tene a che ffa’
cu chillo ca va’ pe’ mare o ca va’ pe’ pisca’,
chisto e’ nu papore ca serve a lor signure
pe’ sguzza’, pe’ fatte lloro, int’’ all ’acque sicure !

E ‘o fanno propeto a mme ca, senza malia,
le curo ‘o populo d’’a pucundria
ca se porta nt’’a nu core , ormaie , arruzzunuto
ca ‘a perz’ ’e rradice e se sente falluto.

A Capua arria essere ‘o Re ‘ncuntrastato
‘nvece quase sempe m’ hannu maltrattato,
nun conto cchiu’ niente e nun so’ cchiu’ nisciuno,
a quanno me se spartano nu poco peruno!

‘N’ anno ce sta’ uno e ‘n’anno ce sta’ chill’ ate,
fanno a turno pe’ tene’ ll’ acqua ‘mbrugliata
mentre ‘e galuppine e ‘e bbuone natature
‘nt’’a stu mare … verde ce vanno sicure !

E chissa’ pecche’ po’ nisciuno ‘e c’ affoga
specie chillo ca fa’ sempe ‘o stroloco
chillo ca aiza ‘a mano, coglie ‘e percoche
e po’ isso stesso fa’ na mmerda ‘a Pro Loco !


.

‘A colpa e’ d’ ’e guerre ca se so’ dichiarate
ll’ Agace e na Pro Loco ormaie scunquassata,
arruinata ‘e chiacchiere, ‘e velene e ‘nfamita’
‘a quanno Orsi ha sfrattato chi ce stev’ abita’.

Chillo c’avessa esse nu mutore ‘e cultura
e’ addeventato ‘a tiempo nu scannaturo,
ogge e’ sulamente nu campo ‘e battaglia
addo’ ce sarra’ priesto na bbona accisaglia.

Ce sarra’ sicuramente ‘a resa d’’e cunte
doppo ca sotto sotto c’e’ stato ll’affrunto
‘e chi ha criato e ‘nfucat’ ‘a baraonna
cu chi sotto sotto sta’ a ffa’ ‘o juoco ‘e sponna.

E mmiez’ a tutta chesta carneficina
Marina Ramelli s’ ha ‘mparato ‘a lottrina,
dice io nun me ne vaco , m’ hanna caccia’
accussi’ le faccio vere’ comm’’e faccia abballa!

Dice uno ca ‘nt’’a Pro Loco ce sta’ a tutt’ ’e ll’ ore
ca s’ hannu magnato tutt’ ‘a carne d’’o bbroro
e ‘o bbroro rimasto ll’ hann’ annacquato
p’’o fa’ vevere a ‘stu povero Carnevale arrunzato.

Ma abbannunammo ‘e chicchiere e ‘sti fesserie
e facimmo posto subbeto all’ alleria
tanto chi e’ ‘ncunia s’hadda pe’ fforza sta’
e vo’ o nu vvo’ ..’nc…lo l’hadda ….piglia’ !

Mo’ penzammo ‘a bevere e a magna’
pure si chist’ anno c’ avimm’ arrangia’,
ma ‘o duvere nuosto e’ de festeggia’
‘o Carnevale antico ‘e chesta Citta’.

Ma del resto sapite ca chistu mio regno
da vuie vo’ sultanto ‘sti quatte impegne :
magna’, vevere , canta’ e abballa’,
pecche’ ‘o Carnevale ‘e Capua e’ chistu cca’ !

Magnammece nu bbello ruoto ‘e lasagna
cotta chianu chianu ‘nt’’o furn’’e campagna
ienchimmela ‘e purpette,muzzarella e ova toste
e affucammole ‘nt’a nu litro d’’o mmeglio ggniostro.

Pe’ sicondo freimmece nu capo ‘e sasiccia
e pe’ cuntorno patane ‘e scarola riccia,
na tiella ‘e custatelle cu ‘e pupaccelle
e n’ arrustuta ‘e carcioffele capuanelle.

Po’ nu poco ‘e spasso ‘e ciociele nustrane ,
na fella ‘e torta fatt’‘e marzapane
chiacchiere, sunguinaccio e castagnole
nu bicchierino ‘e limuncello o nu bbuono rusolio.

Po’ tutte ‘nzieme scennimmo ‘nt’’a chiazza
mascherammece, abballammo ‘e facimmo schiamazzo,
devertimmece cu ‘e curiandule e cu ‘e stelle filante
e menammo ciucculatine a tutt’’e passante.

Po’ sarra’ rosa ‘o sarra’ niro ‘o dimane
e nun ce ne fotte pe’ cchesta semmana ,
po’ quanno sarra’ ce penzarra’ DDio
a c’aiuta’ e ce ‘nsegna ‘a bbona via.

Mo’ ‘o saccio ca v’aggio bbuono sfasteriate
ma ‘sti Cicuzze so’ scritte e penzate
pe’ dda’ na pungulata e na bbona scetata
a cchi ‘a Citta’ se ll’ha nu poco scurdata.

Augurie a tutte quante amice e nimici
e ca ‘o Pataterno ce pozza fa’ sempe felicie,
ca ce dia a tutte quante gioia e prusperita’
e ammore e salute quanta cchiu’ ce ne sta’ !!!

Mo’ ve saluto, v’abbraccio e ve bacio
ma cu nu bbene forte forte e verace,
ma si vulite ca d’‘e putiente ve conto pullece e pimmece
avit’ aspetta’ , si Ddio vo’ , …. ’o duimilaequinnece !

CAMILLO FERRARA

Banner
Banner
 
Banner
Banner
Banner
Banner
Banner
Banner
Banner

Seguici su ...

facebook logogoogle+ logotwitter logoyoutube logo
Banner
Banner

Webcam Capua

Vista sul Lungo fiume Volturno

Vista Sud-Est

Newsletters










Articoli archiviati

Seguici su Facebook

Seguici su Twitter

Capuaonline.com utilizza i cookie per migliorare la vostra esperienza sul sito. I Cookie essenziali impiegati per il funzionamento del sito sono stati già impostati. Per saperne di più sui cookie che utilizziamo e come eliminarli, vedere la nostra policy sulla privacy .

Accetto i cookie da questo sito.