Le Cicuzze 2013: Le quartine pungenti di satira Carnascialesca del Carnevale di Capua

Piazza dei Giudici - Cronaca

CICUZZE 2013

***************** 

Proclama di Re Carnevale

                                    

-   ‘O  cunto  d’’o  Rre   -

 

Ah, povero  a mme,  povero  a  mme,

che brutta fine  sta’ facenno  stu  Rre !

E  pure  Capua, ‘a  Citta’  mia  prediletta,

sta’  caccianno, ‘a tiempo , mille  defiette.

 

E  io  mo’ ce  vaco  pecche’ c’aggi’‘a   i’

pecche’  ‘o  populo  nunn’o  pozzo   tradi’,

ma  si  fosse   pe’  cchi   guverna  ‘o  Palazzo 

nun  me  passasse  manco  p’’o … azzo  !

 

 Aggi’’a  gliottere  e  mm’aggi’‘a  sta’ 

ma  rint’’a  ‘sti  juorne   mm’aggia   sfuca’ ,

me  metto  ‘o  vestito   da   capuanita’

e  ‘nzurf ‘ ‘o  populo  p’’o  fa’  arrebbella’.

 

‘A  ‘n’anno  s’e’  avutato  pur’ ‘o  vangelo

percio’ nun  s’aspettasse ‘e ggrazie  d’’o cielo ,

nun  credesse  cchiu’  ‘o  ciuccio  che  vvola

e   se levasse    ‘a  mussarola.

 

Pecche’   e’  tiempo  ca s’hadda  capaceta’ 

‘e  aiza’  ‘a  capa   e  se  fa’  respetta’

pecche’ si  se  fa’  tratta’   ancora   a’  miulo

piglia  sulo  cetrule  e  cauce  ‘nculo.!

 

‘A  primma  cosa  c’ avimma   chiari’

e’  pecche’  Capua  sta’  turnann’  a  muri’ !

E’ sta’  turnann’ a   muri’  pe’  ‘sta  recessione 

o  pecche’  e’   asciuto  pazzo  ‘o  patrone?

 

Pecche’ ‘sta  Citta’  ‘a  tiempo  e’  cagnata

e  sta’ appecundruta  e  abbannunata ?

E  cchi  e’  c’ ha  pruvucato  chistu   scunciglio

ca  ha  miso  ‘a  Citta’  ncopp’ ‘a  ratiglia ?

 

 

Eppure  guvernano  chille  stesse  signure

ca  passarono   Capua   a  pulitura,

chille  ca  facettero  vie , chiazze , funtane

e  nu  bello  parchegge  sutterraneo.

 

Chille   ca  facettero  rotonde   e  viarelle

comm’a   chella   c’hanno    fatt’ ’o   Maciello

ca   Salzillo   vuleva  c‘’a stessa  ‘mpronta

‘e  chella  famusa  ca  sta’  a   Capemonte !

 

Ma  quale  Capemonte  ca  te reja  all’erta,

nu ll’haie  capito  ca  s’e’  accurciata  ‘a  cuperta ?

Nun  putimmo  mette  cchiu’  nu mattone

e  tu  vo’  fa’  pure  ‘o  riccopellone !

 

Accussi’  le rispunnette  ‘nt’a  na riunione

chillo  ca  pigliaie   ‘e  vute  a  muntone,

dicette “ Gesu’ Cristo  mo’ cammina  pe’  tterra

e  si  iamm’ accussi’ ‘o  Cumune   se  ‘nzerra.”

 

E  allora  commo  se spiega  ‘sta  capriola ?

Nun pigliareno ,  forse , cunzenze   a  carriola ?

E  comm’  e’  ca   so’  gghiute  a  capasotto ?

Chi  e’  ca  ll ‘ha  fatt’ ‘o  contrapaccotto !?

 

Chi   sape  tutt’ ‘e  fatte  d’’a  cucchiara

dice  ca, lor  signore ,  sfunnaieno  ‘a  caurara,

s’e’  perzo  a  goccia  a  goccia  tutt’’o  broro

e  mmo’  so’   cazz’  amare , so’  dulure.

 

E   pe’  remmedia’  ‘a   ‘sta  grave  carestia,

se  so’ raccumannate  ‘a  Vergine  Maria

e  hanno  fatto  vuto  ca  si  fa’  passa’  ‘a  trubbeia

vann’ a  ppiere   fino   a’  Basilica  ‘e  Pumpei .

 

Ma  chi  sape  ‘a verita’  nun parla,  e’  muto

e  fa’  finta  pure  ‘e  essere  ‘nsurduto

specie  quanno   ‘a  sinistra  passiunaria

le  conta  tutt’‘e   ggrane   d’’o  rusario.

 

O  quanno   ‘o  serpente   ‘e  miez’’a  chiazza,

ca   c’‘a  tene  ‘a   mmorte  cu  tutt’’o  Palazzo,

scacateia  comm’a  ‘a   gallina  uvaiola

e  le  cuntesta  tutt’’e   cazze  d’’a  caiola.

 

 Ma  quanno  se  cummenta  ‘a  situazione

se   da’  ‘a  colpa  a  na  cattiva  digestione

c’ accummenciaie   c’’o   sinneco   barone

primma  ca  se  caputava   ’o  carruzzone.

 

E  pe’  paura  ‘e  ii’  a  ferni’  rint’’o  canisto

e  pe’ nun  fa’ magna’  ‘e  criature  ‘e  cumuniste

 fuje  miso  Antropoli  commo  capolista

pecche’  teneva   fama  ‘e   ommo   ‘nzisto.

 

Quanno   arrivaie  ‘o   responzo  ‘a  rint’’a  ll’urne ,

e  Branco  se  vuleva  suicida’   int’’o  Vulturno,

accummenciaie  ll’ascesa  ‘e  ‘stu   duttore

ca  giuraie   ‘e  cagna’  Capua  rint’a  ‘n’ora.

 

E , a  verita’,  a   chesta  Capua  gluriosa

lle  facette  na  cura  accussi’  meticulosa

ca  ‘a  scetaie, ‘nt’a  poch’anne, ‘a  dint’’o  coma 

addimustranno  ‘e  esse  Sinneco   cu  ‘e  pecune.

 

E  mmo’  ca  ‘e  spese  d’’a  cura  ‘e  cavallo

so’  venute  chiano   chiano  tutt’  a  ggalla

sta’  facenno  tutt’’e   sforze   pe’   salva’

na  situazione  ca   allerta  nu’  po’  cchiu’  sta’.

 

Ce sta’ chi  se  lamenta, chi se ne  dispiace,

e  ce  sta’ chillo  ca  nun  se  fa’  capace,

ma  ‘o  nemico , ca  nu  tene  cumpassione,

‘o  ‘mpennesse  sotto  ‘o  primmo  lampione !

 

Ce  sta’  chi riflette  cu  calma  e  dice  ‘a  soia,

ce sta’ chi  ce  chiagne  e  chi  zompa  p’’a  ggioia,

e  chi  mentre  se  fa’  ‘a  barba   addo’  ‘o  barbiere

sente  e  schifato  guarda  ‘a  sputacchiera.

 

Comm’ a  Iannotta  ca   nunn’ ’o   lassa  ‘e  pere

pecche’  ha  giurato  ‘e  le  fa’  cagna’  mestiere,

‘o tratta a piscie ‘nfaccia  e  comm’ a  paisano

le  fa’  nu  manifesto  contro  ogne  semmana.

 

Ma  ce  sta’  pure  na  Capua    fatecatora

ca  nun se  ‘mporta  ‘e  chesta  stregnetora,

so’  chille   capuane  verace   e  urgugliose

ca  lottano  pe’  fa’  turna’  Capua “ SPECIOSA “.

 

Ce  sta’  Centore, che   c’’a fede  e  c’‘a   cultura

cumbatte   chi  ‘a   vo’  vede’  scauza  e  annura

e  Franco Fierro , ca ne  e’  geluso  custode

‘a  defenne  tutt’’e   juorne , comm’a   prode.

 

Ma,  e’  overo  ca  coccosa   nun  va’,

e  ca  ‘o  Palazzo  fa’  sforzo  pe’  ‘n ‘ annia’

dint’’a  nu  mare  ‘e  guaie  e  difficulta’

ca  stess’ isso  s’ ha  criato   pe’  strafa’.

 

E  proprio  dint’’o   mmeglio  d’’a  sagliuta

ll’Amministrazione  s’e’ fermata  e  s’e’ addurmuta,

allora  sulo  ‘e  Cicuzze  ‘a  ponno  sceta’

‘a   ‘sto   letargo  ca  ‘a   port’ a  suicida’.

 

E  a mme, me tocca, sempe, pe’ ‘sti  juorne ,

‘e   fa’  scurda’  ‘e  guaie  e  ‘stu  taluorno ,

speranno  ca   a  cchi  m’ hadda   unura’

ll ‘ hanno  rato   ‘ e  mezze  pe’   puterlo  fa’.

 

Ma  chi m’ aveva  ricere  ca   rint’ ’a  vicchiaia 

aveva  passa’ propr’ i’  chistu  ddio  ‘e  guaio !

Na vota p’’a  pagnotta  e  na   vota  p’’a  recotta

e’  sempe  Carnevale  ca  ce  va’ pe’ sotto.!

 

‘Stu  Carnevale  ‘e  Capua  o  e’  grande  o   e’  ‘nsurdina ,

e’  tale  e  quale  ‘a   valanza    ‘e  donna  Carulina,

n’anno  saglie  ‘ncielo  e  ll’anno  appriesso  scenne

sempe  pe’  colpa   ‘e  chiste   bbuone  a  niente.

 

Ma  ‘a  valanza  ‘e  donna  Carulina  era  bbona  tarata

e  erano  sempe  precise   quantita’   e   pesate,

chella  d’’o  Carnevale  nunn’ e’  stata  maie  precisa

e  nisciuno  maje  ha  cuntrullato  si  era  bbuono   ’o  piso.!

 

Cu  ‘e  cure  ‘e  Raffaele   Modugno   m’ ero  pure   salvato

a’  na  cancrena  nera, puzzulente   e   avanzata,

me  sentevo  gia’   mmano  all’ombra   d’’a  morte

quanno   Rafele  me  salvaie   ’a  chella   malasciorta.

 

Ma  po’ commo  s’ausa   int’ a  cchesta  Citta’

‘a  cosa  era troppo  bella  e  s’ avev’  affussa’

e  pe’   colpa  ‘e  chi   ioca  a  tre  mazz’ ’e  carte

me  so’ truvato   ‘n’ata  vota  senz’arte  e  senza  parte.

 

E  se  turnaie  ‘n’ata vota  ‘o  viecchio  cupione

senza  ca  nisciuno  dette  na  spiecazione

e  i’   povero  Carnevale  me  truvaie  ‘mbriacato

dint’ a  na   situazione   assaie  chiacchieriata .

 

P o’ arrivaie   Orsi  a  presedia’  ’a  Pro Loco

e  cu na mossa sola, senza  fa’  ’o  stroloco,

levaie  subbeto  ‘a  miezo  dduje ,tre   piazziste

e  ‘a  Pro Loco,  accussi’   avetta  cagna’    registro.

 

E  pe’  fa’  ammucca’  ampressa  critica  e  currivo

se  ‘nventaie  cu  Del Pozzo   ‘o  Carnevale  estivo

c’ avette  nu successo  ca  fuje  accussi’  ‘mpurtante

ca  dette nu poco  ‘e   ussigeno  pur’’e  cummerciante.

 

E  chillo   scenario  uneco   d’’e  vecchie   fussate

dette  all’  Ozie  ‘e  Capua  ‘n ‘aria  accussi’  affatata

ca  migliare  ‘e  capuane  e  migliare  ‘e  furastiere

scuprettono  chella  sera  nu  poc’’e   Capua  ‘e  aiere.

 

Ma  nun  fuje  ‘a  nuvita’  ca  ‘o  facette  triunfa’

ma  ‘a  bellezza  d’’e  maschere ca  facette  sfila’,

fuje  na  manifestazione   capace  ‘e   fa’   sceta’

‘o  sango  addurmuto  ‘e  tutta   ‘sta  Citta’.

 

Ma  doppo  ‘a  guerra  se contano   ‘e  muorte

e   ‘nterra  Maurizio   ne  cuntaie  na  sporta,

erano  ‘e   mignatte, ‘e   piattule   e   ‘e  zecche 

ca  me se  stevano  zucanno   cu   tutt’’e   ppellecchie.!

 

Pero’   ‘a  nova  Pro  Loco  n’aveva  fatto  ‘e  cunte

ca  ‘e  cummerciante  ‘e  Capua   so’  quase  defunte

e  che  ‘o  Municipio  ca   sta’  ‘ncrisa   perenne

‘e  nun  t’ ‘e  fa’  vere’  nu  sordo  manco  dopp’’e   calenne.

 

Sperammo ca  chist’ anno  nun  sarra’  fest’  arrangiata

si  no’  sarra’  pe’  Capua   ‘n’ uccasione  sprecata

e  pure  pe’  ‘stu   Cumune    ca  sfiziaie   cu  ’a   lasagna

e   mmo’  nu  ll’ e’ rimasto   manco  ‘n’  uocchio  pe’ chiagne.

 

Chist’ anno  ce  s’ aspettava  ca  girava   ‘a  rota

e  ca  m’ unurava   ll’A.ca. ge  mmece  d’ ‘a  Pro Loco,

e  siccome  ‘o  Palazzo   ha  fatto comm’ a  Pilato

ha penzato, comm’ a sempe,  ‘e  fa’  un’ ammucchiata. !!

 

‘A   fine  ‘o  Comune , quann’  era  troppo  tarde,

dette  ‘nu  cuntributo , bbuono  p’accatta’  ‘e  ssarde

e  Orsi  ca  sperava   ‘e   radduppia’  ‘o  successo

pigliaie   ‘o cuoppelo  ‘e  sarde  e  ‘o  menaie  rint’’o  cesso!

 

Passaje  na nuttata  sana  a  scemuni’  e  ‘a  penza’

cu  chella  lemmosena   che  ce  puteva  fa’

e  p’’o  sape’ sicuro  se facette  fa’  ‘e  maluocchie

ma  ‘a  fine  ‘nt’’o  piatto  c’ ascetter’ ‘e  perucchie. 

 

Allora, deluso  d’’o  Sinneco,  ‘o  nuovo  Presidente,

ca  cu  chille  sorde  nun  ce  puteva  fa’  niente,

raccumannaie   a  Camillo   ‘e  scriverle  ‘ e   Cicuzze

salate  e   pepate   pe’  le  fa’  veni’  ‘o  sulluzzo.!

 

Pur ‘a  dutturessa  Ramelli  cu Fierro  e  Giacobbone

‘sta cosa  ll’hanno  pigliato  p’ uffesa  alla  persona

pure  pecche’ , a ‘sti tre,  nun  ll’e’ mmaje   piaciuto

‘e  essere  manuvrate   commo  se   fa’  cu  ‘e   pupe !

 

E  siccome pure  ‘st’ anno, se  cant’ ‘a  stessa  canzona

me  vene  quase  ‘a voglia  d’’a  ietta’  chesta  curona,

me  songo  sfasteriato  e  tec’ ’e…ccose   schiattate

pe’  colpa  ‘e   ‘sti   persunaggie   accussi’  scumbinate.!

 

Ll’anno  passato  p’ ’a guerra  d’’e pultrone

doppo 125  anne  me  facetter’ ’o  bidone,

e  dettero  tutt’’a  colpa  a   ‘sta   recessione

e  chiavaieno   a’  Pro Loco  nu bbuono  scuzzettone.

 

Ma  pe’ mme’  ss’arrevutaie  quase   tutt’ ’a  Citta’

ca ‘a  chella   sceveta  pazza   nun   se  vulette   chiea’,

“‘o Carnevale nun se tocca”, alluccaie  Franco Fierro

ca  ‘mmitaie  tutt’ ‘e  capuane  a  ffa’ ‘o  butiferro.

 

A  isso  s’aunettero   n’ate   mille  perzone

ca  cu Nicoletta Modugno  sfidaieno  ll’istituzione,

aizarono  ‘o palco   e  se cantaie  e  se sunaie

‘a  faccia  ‘e  ‘sti  signure  e  de  tutt’’e  cuccuvaie.!

 

A mme  m’hanno  ridotto  proprio   ‘e  mullechelle,

stoco  sicco e  panzuto  comm’a  puveriello,

ogn’anno , tutte quante  giurano  ‘e  me  salva’

ma  i’  ‘e  stu  Palazzo  nun  me pozzo  cchiu’  fida’.

 

M’ hanno  levato  cavalle,m’ hanno  levato  ‘a  carrozza,

corte, bandiere  e  ‘a  rrobba  p’’a vozza,

e  teco  ‘e  coscie   ca   me  tremmano  sotto

a  fforza  e  vede’  ‘e  magna’   muzzarella   e  ricotta.

 

Ma  chist’anno, ‘o Palazzo,  pe’  fa’ scurda’  ‘e defiette

ha  ‘ncaricato  ‘o  cunzigliere    Antonio Valletta 

‘e  cuurdina’  ll’  Assuciazione  apposta   ‘ncaricate

pe’  paura  ca  ce  scappa  pure  cocche  siggiata.!

 

E’  cchisto   ll’allarme   che  il  qui’ presente  Cumune

ha perzo  p’’a  via  ‘e  cazune  e  ‘e  gallune,

s’ accummenciaie  a  capi’  quann’ ‘a  crisa  arrivava

e ca ,pe’ ciuciie, ‘nt’’a   stalla , era fernuta  ‘a  bbiava.!

 

Ma   se  sapeva  gia’  c’ aveva ferni’  accussi’,

pecche’  juorno  pe’ juorno  se  vedev’ ’e  muri’

tutta  chella   passione ,  ca  forte  ava  tenuto

chi  pe’  cinq’anne  sane   c’ ava  bbuono  servuto .

 

Mo’  tutt’ ‘e  cunzigliere  ca  ll’hanno   cunzigliato,

cumpres’’o suttuscritto,  vonno  piglia’  ate  strade

ma siccome  so’  surece  c ’aspettan’ ‘ a  refosa

so’ rimaste    priggiuniere   comm’’e    zite  cuntignose.

 

Ma  una  sola  ‘e  chelle,  chella   cchiu’  puntigliosa

pure  ‘nt’a  surecera  e’   assaie   periculosa

pecche’ quanno  se ‘mponta  e  se ne  va’  all’ attacco

minaccia  tutt’’e   juorne  ‘e   fa’  care’  ‘a  bbarracca .

 

Ma  pe’  le  fa’  scenn ’a  freva  ce penza  Marco Ricci

ca  ‘a  ‘sperto  pumpiere  appiccia  e  stut’’e   mmiccie

e  le  fa’  cape’ , c’’o bbuono , ca  si care  ‘a  bbarracca

paricchie   cunzigliere  varranno  a  mogn’ ’e  vvacche.

 

A   chill’ ato  cunzigliere ,  ca  nun  s’accuntenta  maje,

le piaceva  ‘e  senti’, annascosto,  ‘o  canto  ‘e  na   cuccuvaia

ca  tutt’’e  sante  notte  ‘o scetava    a’  dint’’o  suonno

facennele  capi’  ca  era pronto  a  darle   a’  sponna.

 

Ma  chella   cuccuvaia  era   bbona  addestrata

‘a  chillo  ca ,  quase  sempe , nu  vene  annummenato

chillo  ca  fatica  ‘n  silenzio  e  campa   c’ ‘a   speranza

‘e   vere’  nu juorno  ‘o  Sinneco   senza  maggiuranza.

 

Fuje  accussi’  ca  ‘a  cuccuvaia   facenn’’a  carbunara

cuspiraie  notte  e  juorne   proprio   ‘nt’’a   picciunara

addo’  erano  state  asiliate   senza   pute’  cunta’

chille  c’ avano  dice  sulo  si’  quanno   ss’ aveva   vuta’.

 

Pe’  primma  s’ammutinaieno   ’e  muzze  ‘e  ll’UDC

doppo  ch’erano  asciute   a  cchi  si  tu  e  soc’ i’

cu ll’assessore lloro, ca   accugliut’ ’a   pellerino

strizzava ll’uocchie , sotto sotto, a dommene  Austino.

 

Era chillo   ca  salvaie  ‘a  primma  nave  ‘e  Antropoli

e  pe’ chesto   fuje   rengraziato   a  furore  ‘e  populo,

salvaie  ‘a  pelle  ‘o  Sinneco,  ca  dopp ’a  cemmeraglia

‘o  annummenaie  sul posto  pure  viceammiraglio.!

 

Ma quanno  se  ‘nchinaie  ‘o  PRU,  tuzzaie  nu  male  scoglio

‘e  ‘o  vascello  se  caputaie  comm’’a  Costa  Concordia

e  ‘o  persunale  ‘e   bbordo  ridotto  c’’e  peroglie

prutestaie  cu   ll’ammiraglio   e  le   chiedett’ ‘e  spoglie.

 

Ma  ‘o   cumannante , memore, nun   s’acalaie  ‘o  cazone

e  s’allicurdaie  ca    Nino  le  salvaie  ‘a  pultrona,

facette  ‘o  bbraccio  ‘e  fierro  pe’  dduje  mise  chine

cu  chille  ca , ormaje , cunsideravano   traino.

 

 Antropoli  se sentette, comm’a  Rre  Salomone,

ava  sceglie  tra  Ferraro e  Caputo -  Buglione

ma  jett’’a  cerca’  cunziglio  proprio  ‘o  sosia  ‘e  Pilato

ca  ‘o  mannaie , immediatamente ,  a  fa’  na  passiata.

 

E  chella  stessa sera  ritruvaieno   a   Frattasi

ca  era  stato  ‘o primmo  c’ av’ appicciata  ‘a  vrasa,

giurarono  vendetta  e  doppo  ‘n’ora  ‘e   sfoco

sputaieno   benzina   ‘nt’’o core  ‘e   chello  ffuoco.!

 

Chiammaieno  ‘a  cuccuvaia  e  ‘a  mannaieno  a  canta’

a  casa  ‘e  ‘n’ato  vastase  ca  ‘o  stev’ a  saluta’

ma  chisto  ch’era  abituato  ‘allatta’   a  ddoie   zizze

dicette  ca  nun  le cunveneva  ‘e  se  fa’  veni  ‘sta  ‘mbizza.

 

Fuieno  chiammate  allora ,  ‘e  muzze  d’’o  PDL ,

‘a  Del Basso, Caruso e… mazzamauriello 

pigliaieno   ’a  scialuppa   d’ ‘a  fata  ‘mbriana

e  apprudaieno   all’ isolotto  ‘e  Paolo  Romano.

 

E  appriesso  se  purtaieno  pur’ ’a  ‘Ntonio  Minoia

ca appena  se  ‘mbarcaie  priaie  a  Santaloia

ca  si  Antropoli   careva  int’’o  macenaturo

se fosse  fatto  all’istante  monaco  ‘e clausura.

 

Fuie  fatto ‘a  stess’ a notte  ‘o  cunziglio  ‘e  guerra

cunvinte  ca  ‘o  sinneco  careva  a  capanterra

e  stabeletteno  ca  era meglio  d’’o  vere’  scannato

c’ ‘a  mano  d’’o cumpagno   Tonino  Gucchierato .

 

Tonino  Gucchierato  urfanello  ‘e  chella  sinistra

ca  ll’ha  lassato  sulo  a  cumbatte   ‘e  pagnuttiste,

nisciuno se ne fotte  ma  nun  s’e’  scunfirato

pecche’  hadda   fa’  ‘o mazzo   tanto  a  cchi  maje  vv’ ammaginate !

 

Ce  stettero  schermaglie  e  nu  par’’e  arrembagge

ca  in verita’ int’’o  cunziglio  fuieno   n’ assaggio

‘e  chello  ca  venarra’  quann’  arriva   ‘o mumento

ca  Carmine  Antropoli   hadda  i’  ‘o Parlamento.

 

E  si  accussi’  succere  saranno  cazzi  amare

pe’ muozze, temmoniere  e  pe’  lup’’e mare,

pure  Anastasio  chiammata  in  quota rosa

vulesse  abbannuna’  pe’  ‘st’ aria  letecosa.

 

Stu  Rre  nu sbaglia  maje  a  cunta’  ‘e baffe  ‘e  gatte

pecche’ o’  24 gennaio  s’e’  avverato  ‘o  fatto,

‘o  Mattino  ha  ripurtato  ca  Antropoli  e  Romano

se stanno  muzzecanno  comm’ a   dduje  pescecane .

 

Ma  nun  sarra’  na  guerra  fatt’ a’  arme  bianche

ma sarra’ na  guerra  fatta  a   se  romp’’e   scianche

sarra’  perfida  e  suttile  ma   chin’ ’e  veleno

e   a  nisciuno  d’’e  dduje  le  purtarra’   bbene . 

 

Percio’  ce stanno   nuvule   ‘ncopp’a  ‘sta  Citta’

quase  ca  e’ cupole  vonn’ i’  a  cummiglia’,

e  ‘stu  tiempo  fraceto  me  fa’  presagi’

ca  cocche mala  bufera  e’  pronta  pe’  veni’ .

 

E  ce mancasse  pure  chest’ ata  mazziata

pe’  chesta  Citta’  gia’  povera  e   abbacchiata,

redotta  comm’a   gregge  ca  nun  tene  pastore

miez’  a  na  pulitica   ‘e vendetta  e  d’’e  fucore.

 

Ma  nunn’era  meglio   chell’   Amministrazione

ca  ce prummettette  ‘e  ce da’  na  nova  stagione ?

Pecche’  tutt’’e  speranze  ‘e  nu  dimane  ‘e  bbene

a   Capua  anneiano   sempe   int’a   nu  mare  ‘e  veleno ?

 

E  ll’esperta   capera  ca  legge  dint’’a  sfera

dice  ca uno  d’’e dduje  sta’ , ‘a tiempo,  ‘mpenziero

pecche’  teme  na  lotta  ca  sarra’ senza  quartiere

ca  ‘o  po’  vere’  pe’  sempe  distrutto  e  priggiuniere.

 

Se  sente  ‘nt’ all’aria   ca  ‘o  diluvio  ‘e   vicino,

ca  purtarra’, cu  ll’acqua , penziere,   pene  e   spine

a  tutte chille  ca  nunn’ hanno  mantenuto

’e   facile    prummesse  a  ‘sta  Capua  feruta.

 

E  mo’  ca  p’‘e   diebbete  e’  arrivata  ‘a  sciummara

coccheduno  a’  vo’  assecca’  pigliann’ ’o  panaro 

ma  ll’acqua   ca  piglia  se ne scenne  pe’ sotto

pecche’  ormaie   e’  tarde , ’o  papero  e’  ccuotto !

 

So’  diebbete  antiche  ma  pure  ‘e   nova  fattura

e  ne  so’  tante  e  tante   ca  fanno  paura,

so’  anne   e  anne  ‘e  allegra  finanza

ca   so’  venute  a galla  e  nun  danno   speranza.

 

Allora  chi  penza  ‘e   scenne  d’’e ccoglie  d’Abramo

pe’  se salva’  ‘o culo  s’ha  ‘nventato  nu piano

e  pure  sapenno   ‘e  pruvuca’    n ‘ammuina

e’  gghiuto   truvanno  a  Cristo  dint’ ’e  lupine. !

 

Ma  mo’  dic’ io, c’’o duvuto  rispetto,

ma proprio  a  Natale  c’ avite  miso  a  peretto ?

‘Mmece  ‘e  c’arriala’  panettone   e  cascette

c’ avit ‘ arrialato  …. na  carretta  ‘e   bullette.!

 

E   chesta  Citta’  ca  steva  gia’   scafacciata

s’ avut’  acculla’  pure  ‘sta  bidunata ,

e  mmo’  sputa  veleno  contro  a  tutt’’a  ciurmaglia

peggio  ‘e  nu nido  ‘e  serpiente  a  sunaglie.

 

E’ stato chisto  ‘o  colpo   pruibito

ca  h ’addenucchiato   e  h’ addebbulito

‘st’ Amministrazione   ca  soffre   e  arranca,

e  si’  nunn’  e’   morta  poco  ce  manca.

 

E  ce vuleva   pure  ‘sta  maronna  ‘e   IAP

pe’  farla   ferni’  ‘ e   scemuni’,

ma commo, s’ arrevutaieno   pe’  na  manna’

e  po’, lloro  stesse, se  ll’hanno  jut’  a  cerca’.!?

 

‘A  pensata  era  bbona   si  cu  ‘e  cuurdinate

ll’ IAP  pezzecava   a  cchi  nunn’ aveva  pavato,

a  chella   gente  ca  mentre  chiagne  e  suspira

magna , veve  e  fotte  a  chi  rire.

 

‘A  lotta   s’aveva    fa’  a  chi  s’ha  scapputtata

e  ll’  ICI  e  ‘a  mmunnezza   nunn’  ha  maje  pavato,

‘mmece  ‘e  tutta  ll’evera  s’e’  fatto  uno  fascio

menann’ ‘a  ggenta  unesta  dint’’o  scatascio!

 

Ma  si  nunn’o  facevano, dice  ‘o  malepensante ,

‘o  Cumune  se  ne  ieva  ’o spiritussante

pecche’  ‘o Palazzo   steva  talmente   a  sicco

ca  sulo  pe’  miraculo   ieva   gia’  azzicco  azzicco.

 

‘A  colpa   sarra’  forse   d’’e  furbe  e  d’’e  forte

c’ hanno  fatto  pe’  tant’anne  ’e   ccose   storte,

‘e  chille  scuscenziate  ca  pe’ se   magna’  ‘e  pullastre

ammiscavano   apposta   figlie  e  figliastre!

 

Speriammo  ca   ‘o  Cumune   nun  va’  ‘nt’’o   dissesto

sino’  e’    gghiut’  a   Puortece  pe’  na  rapesta ,

pecche’  doppo  ’o   burdello   ‘sta  IAP   miscioscia

se  truvarra’  pure   mmano  na  vranca  ‘e   mosche.    

   

Ma   ll’ammuinapopulo   ca   fa’  ‘o  bannitore

h’ allertato  ‘a  Citta’  pure  pe’  ‘Ntonio  Fiore

ca  ha mannato  ‘e  bbullette   p’’o  depuratore

pe’  quanno  nunn’  ha  funziunato  manco  pe’  ‘n’ora!

 

Ma  chi  ava  gia’  pavato  e  nun  s’ aspettava

ha cacciato  subbeto  ll’ ogne  e  ‘a  bbava

e  penzanno , pe’ riflesso,  ‘a   pastette  e   a  purpette

h’aurato  all’ Aministrazione  nu  subetaneo  arricietto.

 

Ma  mar’a  cchi  hadd’ ave’  e  viat’ a  cchi  hadda  da’

pecche’ chi  ha  ripavato  ha   voglia  ‘e  aspetta’,

chiste  so’  comm’o  mare  ca  sempe  vo’  piglia’

ma  po’  quann’ h’ avuto  cchiu’ niente   te  vo’  da ’.

 

E  chi  ha  gia’  sufferto   pe’  stupre  ‘e  Tremonti

e  p’’e  supposte  ‘e  lignammo  ca  ll’ ha  miso  Monti ,

ha passato  nu  Natale   tra  jastemme   e   diasille

arrefrescannese   ‘o culo   c’’a   cambumilla.

 

Nun ce mantenimmo  cchiu’   ‘ncopp’’e  denocchie

e  appena  appena  c’e’  vedimmo  cu  ‘n’uocchio 

e  si  p’’o  duimilaetridece   cuntinua  ‘o  filotto

pe’  ce  pute’  ripiglia’  ce  vo’  ‘o   118 !!

 

Ma  mentre  ‘e  povere  criste  s’alleccaveno  ‘e  ferite

a  Roma scialava  Batman , ‘o  cunzigliere  Fiorito,

chillo  ca  s’ha  futtuto  sorde  a  muri’ a’ chistu  Stato

ca primma s’ha fatto  fa’  fesso e  ppo’  ll’ ammanettato.

 

Chisto  e’  ‘o  vero  esempio  ‘e  chell’  ata  Italia

ca magna  a  trademento  e  campa  ‘e  baccanalie,

si  fosse fatto ‘o prevete, v’’o  dico   a  auta  vocia,

se fosse  futtuto  ll’altare  cu  Cristo  ‘ncopp’ a’  croce .

 

‘Mmece  ‘nt’ a  nu  cunvento,  nu  giudece  piatuso,

c’ ha mannato  a  ss’arrepusa’ ll’unurevule  Lusi

si’, proprio  chillo   ca  sfrunnaie  ‘a  Margherita

e  se  futtette   miliune  ‘e  euro  cu  nu colpo  pruibito.

 

Rutelli   ‘ntervenette , ll’appellaie    mariuolo

e  chiammaie   ‘e   carabiniere  pe’  fa’ scatta’  ‘a tagliola

e  quann’’o  sapette  Lusi , chiammannelo    traino

le dicette  :  ‘a  saje   pure  tu  ’a  morte  ‘e  Giacchino.!

 

Chisto  e’  ‘n’ato  bell’  esempio  ‘e  chi  ce  guverna

‘e  chi  avess’  essere pe ‘ nnuje  esempio  e  lucerna,

a  Capua  ce  sta’  nu  ditto  ca tramandano   ’e   bbizzoche :

 “  ‘a puttana  dalle  luoco  e  ‘o  mariuolo  dalle fuoco! “

 

 A  Milano  chillo  bbello  ninno   ca  chiammano   Trota

se scegliette   ‘a  cunzigliere  na  vita  ‘e  galiota 

se  pizzecava   ‘e  sorde  pure  in  ripresa  diretta

finche’  nu  bello juorno  nu’  gghiette  int’’a  cascetta.

 

Quanno  ‘o  venette  a  sape’  ‘o  pate , “ce ll’o  duro”,

le dicette “ viene  a  papa’, nun  te  mett’ appaura

pecche’   i’  stesso , me  cunfesso  ‘o  peccato,

m’ accatto  ’e  canuttiere  cu  ‘e  sorde  d’’o  Stato.

 

 Chesta  nunn’ e’   ccosa  grave  e  nun  si  delinquente

si  t’accatte   coccosa  cu  ‘e sorde  d’’a  ggente,

pienze, bell’ a papa’, ca  quann ‘ ero segretario

ce  facev’  asci’  tutt’’e  juorne   pur’’e   sicarie.

 

Percio’,  statte  tranquillo  , cuntinua  a  manzulia’

pecche’, figlio  mio  bbello , te  prutegge  ll’umerta’

‘e  chi   ca  comm’a   nnuje ,  sape  bbuono   sfrutta’

‘a  bbona  fede  d’’e   strunze  ca  ce vann’  a  vuta’.

 

E  po’ nun  te  scurda’  ca  cu  Roma ladrona

ormaje  simmo  addeventate  na  sola  perzona

a  nnuje  ce tocca ‘e  fa’  ‘a  parte  d’’o  cane  c’ abbaia

pecche’  tenimmo  ‘ncapo  ‘e  ce  magna’  tutta  ll’ Italia !!

 

A  chill’ ’e  sinistra  ca  giudicava  e  mmo’ e’  giudicato

le piacevano   ‘e  ppiadine  c’’a  ciucculata,

s’ccattav’ ’e mmutandine, cazettine    e  ziarelle

ma  ‘mpazzeva   p’e’  caramelle e  p’’e  vase  ‘e  nutella.

 

In piena  stagione  pe’  ss’arrefresca’  ‘o  zezzeniello

‘o  puvero  figlio  s’ accattava   ‘e  gelatielle

e  quanno  se truvava  pure  ‘o cocco  e  ’e  lupine

pecche’ le piaceva , assaie,  ’e  avvita’  ‘e….  lampatine.!

 

A  chisto  ca le  vuo’  dicere, fa’ sulamente  pieta’,

e’ uno  ca  ncopp’ ’a  terra  nunn’e’  degno  ‘e  ce  sta’,

uno  ca se venne  ll’unore   pe’  ddujeeuroesittanta

s’avess’  atterra’  vivo   vivo  ‘nt’ ’o campusanto.!

 

A  Napule ,mmece, hann’  aparat’ ‘a rezza

e  ce  so’ carute  tre  pisce   ‘e  qualita’   e  grannezza,

se dice  ca  tutt’’e mise  le   rimburzavano   ‘e  denare

pure  quanno  se  ne  ievano  a  sfizia’  cu  ‘e    cummare.

 

Mo’  vann’ a   a  ferni’  c’’a  capa  dint’’a  canesta

na  bbona  spasella  ‘e  piscie  disuneste

ma  si  ‘a  Finanza   ce   fa’  cchiu’   attenzione

‘nt’a rezza  ce  va’  pure   cocche   sturione.

 

 E  mo’  se  spiega  pecche’  vonno  ll’addizionale

pecche’ cu  chille   sorde  ce  fann’’o   speziale,

‘mmece  e  ce  fa’  ‘e  vvie, ll’ asile  e  ‘e  spitale

vedono  comm’ hanna   fa’  pe’  gghi’  a  Puceriale.

 

A  Roma  ll’unurevole   so’  tutte  aneme  sante

ca  stanno   ’o  Parlamento   p’’o   spiritussante,

e’  tutta  gente  sana  e  timurata  ‘e  Ddio

ca  nun  s’e’  maje  permiso  ‘e  fa’  chesti  pazzie.

 

Lloro  apparteneno   a  na   casta  accussi’   spiciale

ca le permette, quanno  vonno,  ‘e  metter’’o  mmesale

e   se magna’  chello   ca vonno , a  lloro   piacimento,

e   d’’o mettere  a  cunto   a  nnuie    povera  gente .

 

A  paricchie  nu’  ll’abbasta    stipendio   e  ‘ndennita’

e  tutto   ‘o  riesto  ca  se  ponn’  arraffa’ ,

ma   pe’  se  scanza’   ‘o carcere  e  pe’  sfui’  a’  legalita’

se  so’  mmiso  sott’ ’o  ‘mbrello   ‘e  ll’immunita’.

 

E  a  nnuie  ca appena  appena   c’ accattamm’ ’o  ppane,

c’ hanno fatto   ‘nu  culo  comm’ a  Portacapuana,

c’ hannu   jencuto  ‘e  tasse  e   c’hanno   spremmuto

tanto  ca  ddiece  ‘e  nuje  vanno  ‘nt’ ’a  uno   tavuto .!

 

Se  stess’  bbuono  accuorto  ‘o  Presidente  Napulitano

a’ chesta maniata  ‘e  figlie  ‘e ………bellambriana,

se  mettess’ ’e   curazziere   annante  e   aret’ ’a porta

si  no  se  fotteno  a  isso , ‘o  Quirinale   e  ‘a  cunsorte. !

 

Tutt’’o  sistema ‘e  fraceto, fa’  vierme  a’  tutte parte,

nun ce  ne  sta’  nisciuno  ca  tene  a  pposto  ‘e  carte,

so’  na massa  ‘e  mignatte   e   puorce  fora  razza

ca  c’hanno  sfasteriato  e  c’hanno  rutto  ‘o …  cazzo !

 

E   teneno  pur’’o   curaggio  ’e  se presenta’

a  cerca’  cunzenze  a   chi  nun  po’  campa’,

lloro  sguazzano  e  chi  sta’  ‘ncopp’ a ratiglia

a  stiente  a  stiente  po’  da’  a  campa’  ‘e  figlie.

 

Nun  ce se   fa’   cchiu’, nemmeno  a  magna’

e  si  nun  se magna  nun se po’  i’  a ….. evacua’

per  cui   ‘nta  tutt’’e  ccase  ‘e  ll’uneste  e  d’’e  fessi

s’ hanna  chiurere  pe’  legge  ‘a  cucina   e  ‘o  cesso.

 

E  chissa’  quant’acqua  c’hanno  fatto  ‘ntusta’ !

E  quanta  chiacchiere   c’ hanno  saputo  cunta’ !

Ma  ‘a colpa  e’  de  na parte  d’’o  populo  italiano,

ca  se  venne  ‘o  destino  ‘ncagno   d’’o  sottamano.!!!

 

Ma  del resto c’ hanna   fa’  chisti  povere   criste

si  avano  a  cche  ffa’  cu na massa  ‘e  affariste

ca ogni  cinq’anne   s’’e  vota  e  s’’e ggira

pe’  le  zuca’  ‘o  sango  comm’ ’e  vampire.

 

Ma  si,mmece,  ‘o populo  le  cuntasse  ‘e  pile,

e , ogni  tanto, ‘e  farria  passa’  p’’a  trafila

e  le  levasse   cummerita’, vizie  e  ‘o   sciale

‘e  farria   caca’,  a tutte  quante , ‘nt’ a  nu  ritale !! 

 

Ma  mo’  avimma  vere’  addo’  jamm’ a  para’

cu  chest’ Italia  nosta  ca  se  sta’ a   scunucchia’,

speriammo  ca  ognuno   sente  ‘a  cuscienza

pe’  da’  all’  Italia   nu  guverno  ‘e  efficienza.

 

S’ hadd’ arapi’  ‘a  fenesta e  s’hadda  cagna’  ll’aria,

paricchie  ‘e  ‘sti  signure   so’  comm’’o   calannario

mannamm’  a’  casa  ‘e  viecchie  e  mettimm’ a  ggenta nova

si  vulimmo  ca  ll’Italia   affronta  nuove  pprove.

 

A Capua  ll’ avimma  ritto  ‘e  ccose commo  stanno,

‘o  Cumune  ‘a  cocche  tiempo  sta’  dint’’a  ll’affanno

dice nu  bbello  ditto  ‘e  tanto  tiempo  avanto

“nun  sempe  ‘o  giglio  fiurisce  e  ‘a  cicala  canta “.

 

E  mmo’  ca nun  se ponno  fa’  cchiu’   ‘ntrallazze  e   squase

coccheduno   va’ dicenno   c’ aveva  ragione   Frattasi

e  ll’assessore  Cembalo  ca   pe’ chesto  piglia  ‘a freva

le risponne  ca si   ‘o  gallo  cacava,  coco’  nun  mureva !

 

‘E casse  d’’o  cumune  stann’ accussi’  arraggiate

ca  so’ peggio ‘e   nu  quintale   ‘e  alice  salate,

dice  Casucci  che  sta’  a  Corte  d’ ’a  Bagliva

e  ca  nun   lle  serve  a  nniente  ‘a  terapia  intenziva !

 

Era  na  nave  sicura  c’ aveva   navigavato

pe’  mmare  difficile  e  aveva  superato

scoglie e  secche  e  aveva  pure  piscato

tonnellate   ‘e  piscie  ca  tenev’ astipate.

 

Mo’  ognuno  scarreca  ‘a colpa  ‘ncuoll ‘a  chill’ ato

e  chesto ‘o  ffa’ spicialmente  ‘a  pipp’  appilata

ma  ‘o  Sineco, sfaccimmo,  ca   resiste  ‘a  trubbeia

ll’ ha ritto :  giuvino’ cca’ more  Sanzone  cu  tutt’’e  filisteie.!

 

Chillo  ca  se vatte  ‘mpietto  ha  pigliat’ ‘e  distanze

e  s’’a pigliato’ ,‘o fesso, pure  c’’a  cittadinanza

e  vuo’  vere’ ca  ‘a  fine  a  stu populo  feruto

‘a  copp’’o  ccuotto  ce  votte  pure   ll’ acqua   vulluta !

 

‘O  cunzigliere  Brogna  ca  s’occupa  ‘e  cultura

facette  nu  cunvegno  p’’a  fall’ asci’   d’ ’o scuro

ma nisciuno  ll’aiutaie   pe’  mmiria  o  p’e  paura

ca  Fernando  ‘e   metteva  a   fa’  ‘a  sculatura.

 

‘A  quanno  succedette,  cu na  faccia  mesta mesta,

Fernando ha preferito  ‘e  s’affaccia’ a’  fenesta

e  quanno  se sfoca,  giura  ‘ncopp’‘o  crucifisso,

ca  nun se ne fotte cchiu’ , venesse  pure ll’ eccrisse.!

 

Pure Pietro Caruso,  ‘o miedeco   dentista,

dice ca  cocche  juorne  fa’  pur’isso  ‘o ‘nzista

pecche’ s’e’ sfasteriato ‘e  fa’ ‘a  rota  ‘e scorta

a  chi  nun fa’ maje niente   ma   magna  sulo  torte.

 

Ma  ‘mmece  ‘e   s’ appicceca’  e   s’avvelena’

pecche’  nu vedono nu poco  chello  c’ hanna  fa’

pe’  ripiglia’  ‘n’ata vota  chesta  bella    Citta’

ca  ‘a  nu poco  ‘e  tiempo   sta’  a  sparpeta’.

 

 Guardasser ’e   scole   quanno  cchiu’ ampressa

pecche’ ce manca  pure  ‘a  carta  p’’o  cesso

e  pavassero  ‘e  cedule  a  tutt’’e  librare

e  nu  facessero, comm’  a  sempe , a  craie a  craie !

 

‘E  funtane, senz’acqua,  so’ triste e  ammutulute,

so’ comm’ a   tant’  aneme  patute  e  sperdute,

ridatece   ll’acqua   e  facitele  canta’

pecche’  sso’  lloro  ‘a   priezza  ‘e  chesta Citta’

 

Accunciate  primm’ ‘e  vvie   ca  stanno  scassate

cu  ‘sti  belle   lavore  ca  song’  accummenciate,

accunciate   addo’  nu  ce stanno  ‘e  vasule   pe’ tterra

pecche’  pare  ca  stammo   ‘o  tiempo  d’’a  guerra.

 

Chella  ch’era   ‘a   passiata  ‘ncopp’’o  Vulturno

e’ ridotta  malamente   a’  fa’  mettere  scuorno,

e’  addeventata  bosco  ‘e  fiche  e  cesso  p’’e  cane, 

‘o  Cumune  pruvvedesse  senza  fa’  ll’indiano !

 

Proprio  annante   addo’  se trase  ‘o mercato

‘o pavimento ,‘a tiempo,  s’e’  sprufunnato,

quanno  chiove  nun  ce  vo’  sul’’o  ‘mbrello,

ma  ‘nu passaggio  c’’o  lontro  ‘e  Ciamulella.

 

Pe’ salva’  ‘o  cummercio  ormaje  e’  troppo  tarde,

forse e’ mmeglio  a  chiamma’   a  Lello Ricciardi,

s’e’ visto a Natale  ca  cu  chella   llummenaria

Capua   era peggio  ‘e  na …sala  murtuaria.!

 

‘O  parco  gioche  sta’ ancora  p’’a  via

e  quanta  tiempo  ce vo’  ‘o  ssape  DDio

e’  certo pero’  ca  doppo  cinq’annate

‘e  criature  so’ crisciute  e  se so’ pure  spusate!

 

‘E  mascule, ’mmece, so’  addeventate   giuvinotte

e  d’’o parco  gioche  cchiu’  nun  se ne fotteno,

percio’  jate  chiano  chiano  e  nunn’  arrunzate

pecche’  tenit’ ‘o  tiempo   ca  fann’’o  surdato.

 

P’’o  verde   Capua   nun  se po’  lamenta’

pecche’  tene  buche’  ‘e  sciure  pe’  tutt’ ’a  Citta’

uno ‘e  chiste  sta’  annante   ‘e  Vigile  Urbane

proprio  a  vvinte  passe  d’‘o  Museo  Campano.

 

So’  buche’  ‘e  rammegna  e  d’ ever’ ’ e  mure

e  de  piante  spuntanee   e  diverze  culure,

ma  chella  ca  spicca  e’  chella   bbella  cecoria

ca  e’ bbona  p’  alleggeri’  tutt’‘o  pappatorio.

 

‘Sta  Capua  nosta , Citta’  storica  e  antica

st’ addeventanno  ‘a  Citta’ d’’e  piant’’e  fiche,

proprio  ncopp’a   ‘a  cupola  d’ Annunziata

ce ne stanno tre  ca  so’ assaie  sviluppate.

 

Si  se scetasse    Domenico  Fontana

ce facess’  ‘o  culo  comm’ ’a   mulignana,

ce  chiavasse  tante  caucie  e  ‘ntorzafaccia

ca ce  facesse  addeventa’   comm’’a  petaccia’.

 

Ma  ‘e  ‘ste  fiche  spuntanee  ce ne  stann’a  decine  

e  stanno  futugrafate  pure  ncopp’ ’e  cartuline,

pecche’ monumente , cupule  e  cchiese  antiche

a  Capua  stann’  appese  ‘e  piante  ‘e  fiche.

 

D’’o  traffico ca ne  parlammo  a  ffa’,

pe’  vvie ‘e Capua  nun  se po’   cchiu’  cammena’

pecche’ ‘nt’’a  ‘sta’  Citta’  ce manca  ‘o  mmeglio :

ce manca  chi   aiza’  ‘o culo  ‘a  copp’’a  seggia!

 

Ce manca  chi  fa’ respetta’  ordine  e  disciplina

e  tene  ‘a  forza  ‘e  acchiappa’  p’’o  cruattino

a  chi  piglia  pe’  cculo  populo   e  istituzione

vuttanno  pur’’a  mmunnezza   for’ ’e  bidune !

 

Chi ne parla  e  ce  tene   endusiasmo

dice  ca ‘o  Sport  a Capua   e’ nu  fantasma

pecche’  chillo  ca   fa’  finta  ‘e  ce   tene’   assaie

ce   porta  cammenanno  ‘a   anne  a craie  a craie.

 

E ce mancava  pure  ‘o viento  e  ll’ acquarella

‘ncopp’a  ‘sta Citta’ ca nun tene  cchiu’ pelle,

pur’’a  Rigina   tene   ‘e  panne   stracciate

e  tene  ‘e  scarpe  ‘nfose  e  sgualleriate.

 

Arriva  acqua   pe’  sotto  e  pe’ coppo

ncopp’a   sta citta’  ca  s’aspetta na  toppa

primma  c’addeventa   carne  ‘e  maciello :

e  coccheduno  ‘a  scanna   comm’’a  purcella.!

 

E  i’ peggio  ‘e  accussi’  nun  putev’ arriva’

‘nt’’a  chesta Capua  anziosa  ‘e  ‘ncuntra’

Chistu  Rre  ca  nunn’ ancora   hadda  capi’

si  e’ stata  na  trappola  chella   ‘e  ll’ IAP. !!!

 

Ma  pecche’  ‘o populo   fa’   ll’evera  molle ?

si  se fa puntone,   ’o cane  ‘o piscia  ‘ncuollo !

A  cchi aspetta  allora  ? Pecche’  nun  se  fa’ senti’ ?

Nunn’’o   vede ca  chiano chiano   se  st’ appezzenti’ !

 

E  mo’  addo’  stanno  ‘e  sulone  e  ll’ambeziuse ?

E  chille  ca penzano  ‘e  tene’  ‘a scienza  ‘nfusa?

Addo’ stanno  ’e  difenzore  ‘e  tutta  chella  gente

ca  nun se sape  defendere  e  nun  tene niente?

 

Se facessero annante  e  spicciassero  ‘o fatto

si  e’  overo  ca  nun magnano  ‘nt’’o  stesso  piatto

forza, a  cchi  aspettano, ce  mettessero  ‘a faccia

si  e’  overo  ca  nun  vevono  ‘a  stessa burraccia!!

 

‘A  verita’  e’  ca  s’hanno  fa’  sulo  ‘a  mostra

pecche’ stanno  tutte quante ‘nt’’a  stessa  giostra

ca  gira pe’  tutte , ma  fa’ pava’  ‘o biglietto

sulo  ‘e  poverecriste  c’ hann’  ave’  a  peretto!

 

Speriammo  sulo  ca  passa ‘sta  miseria

e  vene  ampressa nun  poc’ ‘e  defregerio

pe’ tutta  ll’ Italia  e  che ‘sta  Capua  nosta

pozza  turna’  ‘n’ata  vota a  metterse ‘mmostra.

 

Chello  ca  s’e’ ditto  dint’a  chesti  Cicuzze

e’  stato  ditto pe’  fa’  sfuca’  chesta marruzza,

ma  dint’’a  ‘sta satira  nu ce  sta’ cattiveria

ma  sulo  e  sultanto  nu  desiderio.

 

‘E  vere’  Capua   nosta  bella  e urdinata

cu ‘e cittadine  affeziunate  e  disciplinate,

‘e  vederla  sicura  ‘e  repiglia’  chella  via

ca pe’ destino ll’ assignaie  ‘a  grazia  ‘e  DDio.

 

Percio’  e’ sulo   pungolo  pe’  ‘st’ Amministrazione

pecche’  torna  ‘n’ata vota  a  se  mett’ ’o  cazone,

s’ avota  ‘n’ata vota  ‘e  puze  d’’a  cammisa

pecche’ sulo  accussi’ ce  fa’  turna’  ‘o  surriso.

 

Augurie cu  tutt’’o core  ‘o  Sinneco  Antropoli

ca pozz’ i’  a’  Camera  a  furore ‘e  populo

ma pe’ tramente  s’armasse ‘e  autorita’

pecche’ Capua   a’ isso   chesto  se  sta’  aspetta’.

 

 E  all’ate   candidate  n’ augurio  vivo e  sincero

a  Affinito, a Del mese, e  a Nicola Scalera

nu bello  in bocca al lupo, ca schiattass’ ’o  lupo

e  ca fernesse pe’ Capua  ll’opera  d’’e pupe.

 

Mo’ ve chiedo  venia  si  v’aggi’’a  sfasteriate

ma io , ‘a verita’ , me  songo  allicriato

e  fosse   capace  ‘e  parla’  ancora  pe’ ‘n’ora

pecche’ e’  ’o svizio  vuosto  ca   io   tec’ ’a  core.

 

Ma  primma  ca  i’   m’aggii’ ‘a   ferma’

ve chiedo nu piacere  ca   m’avita  fa’

pe’  taglia’  ‘sti  Cicuzze  dateme  na  forbice

e  po’  ‘o riesto  v’’o ddico   ‘o… duimilaequattordice. !!!

 

 

Capua 31 gennaio 2013  - San Ciro -

 

                                              Camillo Ferrara

 

 

    Dice ‘o populo : Provole  e  presotte, e   i’  ‘nce  vaco  pe’  ssotto !

Banner
Banner
 
Banner
Banner
Banner
Banner
Banner
Banner
Banner

Seguici su ...

facebook logogoogle+ logotwitter logoyoutube logo
Banner

Webcam Capua

Vista sul Lungo fiume Volturno

Vista Sud-Est

Newsletters










Articoli archiviati